Բանակցություններ են սկսվել «Յուքոմի» կողմից «Օրանժ Արմենիա» ընկերության 100 տոկոս բաժնետոմսերի ձեռքբերման շուրջ

«Օրանժ» և «Յուքոմ» ընկերությունները բանակցում են «Օրանժ Արմենիա» ընկերության 100 տոկոս բաժնետոմսերի ձեռքբերման շուրջ: Արդեն իսկ տարվում են բանակցություններ միջազգային ֆինանսական հաստատությունների ներգրավման ուղղությամբ:

«Բանակցությունները վերաբերում են ոչ թե «Օրանժ Արմենիա» ընկերության հայկական հեռահաղորդակցության շուկայից հեռանալուն, այլ ընդամենն ընկերության բաժնետիրոջ փոփոխություն է նախատեսվում և «Օրանժ» խմբից բաժանետմսերի փոխանցումը «Յուքոմ» (Ucom) ընկերությանը»: ԼՈւՐԵՐ.com-ի լրագրողի փոխանցմամբ՝ մամուլի ասուլիսի ժամանակ ասաց «Օրանժ Արմենիա» ընկերության գլխավոր տնօրեն Ֆրանսիս Ժելիբտերը:

«Յուքոմ» ընկերությունը, առաջարկելով նորարական լուծումներ և բարձրորակ ծառայություններ, կարճ ժամանակահատվածում կարողացել է իր հաստատուն տեղը զբաղեցնել ֆիքսված կապի շուկայի առաջատարների շարքում:

Հարցին, թե արդյոք Հայաստանից կհեռանա Ֆրանսիս Ժելիբտերը պատասխանեց. «Ես Հայաստանից հեռանում եմ օգոստոսի 31-ին: Իմ՝ կարճ ժամանակում հեռանալը կապ չունի բաժնետիրոջ հնարավոր փոփոխություն հետ, այլ՝ ընտանեկան պատճառներով է. խոստացել եմ ընտանիքիս սեպտեմբերին լինել Ֆրանսիայում»- ասաց Ֆ. Ժելիբտերը:

«Օրանժ» և «Յուքոմ» ընկերությունների բանակցությունների դրական ավարտը հնարավորություն կընձեռի պահպանելու և միավորելու «Օրանժ Արմենիա» ընկերության մոտ 500 հոգուց բաղկացած պրոֆեսիոնալ աշխատակազմի ներուժը, ինչպես նաև նորարարական տեխնիկական հզորությունը: Արդյունքում՝ բաժանորնդներին կմատուցվեն գերժամանակակից և որակապես տարբերվող կոնվերգենտ ծառայություններ, ինչպես նաև լրացուցիչ հարմարավետություն՝ մեկտեղելու բազմազան ծառայությունները և օգտվելու հեռահաղորդակցման ծառայությունների ողջ սպեկտրից մեկ վստահելի օպերատորից, ինչի հնարավորությունը մինչ այժմ չի եղել հայաստանյան շուկայում։