Էլիզաբեթ Երկրորդը բացում է իր նստավայրի դռները ցանկացողների համար

Մեծ Բրիտանիայի Էլիզաբեթ Երկրորդ թագուհու լոնդոնյան պաշտոնական նստավայրը՝ Բուքինգհեմյան պալատը, բացում է իր դռները բոլոր ցանկացողների համար և հասանելի կլինի այցելությունների համար մինչև սեպտեմբերի 27-ը: Ինչպես տեղեկացնում է «Արմենպրես»-ը՝ վկայակոչելով ՏԱՍՍ-ը, առաջին անգամ թագավորական ընտանիքի երկրպագուները կկարողանան պալատ մտնել գլխավոր մուտքից, որը նայում է դեպի Մել փողոց։ Նման պատվի, սովորաբար, արժանանում են միայն պետության ղեկավարները, տիեզերագնացները, հայտնի մարզիկները և թագուհու և թագավորական ընտանիքի կողմից հրավիրվածները, նշել են Բուքինգհեմյան պալատում։ Ավելի վաղ այցելուները պալատ էին մտնում կողքի մուտքից:

Թագուհու գլխավոր նստավայրի հյուրերին կառաջարկվի ծանոթանալ «Թագավորական ընդունելություն» ցուցադրությանը, որտեղ կներկայացվեն խոհանոցը, գինու մառանը և կարի արհեստանոցը։

Այցելուները կտեսնեն նաև թագուհու զգեստները, որոնք նա կրել է պաշտոնական ընդունելությունների ժամանակ, ինչպես նաև նրա ստացած նվերները։

Բուքինգhեմյան պալատն առաջին անգամ լայն հանրության համար իր դռներն է բացել 1993 թվականին: Այդ ավանդույթը շարունակվում է մինչ օրս: Մուտքի համար անհրաժեշտ է վճարել 32-55 դոլար՝ կախված այցելության ծրագրից: