Հյութերը, թեյը և սուրճը չեն կարող փոխարինել մաքուր ջրին. սննդաբան

Հյութերը, թեյը և սուրճը չեն կարող փոխարինել մաքուր ջրին, իսկ օրվա ընթացքում 11:00-16:00-ն ընկած ժամանակահատվածի արևը չափազանց վտանգավոր է մարդու օրագանիզմի համար: «Արմենպրես»-ի փոխանցմամբ՝ լրագրողների հետ հանդիպմանը այս մասին ասաց սննդաբան Հասմիկ Աբովյանը՝ խորհուրդ տալով բնակչությանը հնարավորինս խուսափել արևի ուլտրամանուշակագույն ճառագայթներից: «Ամռանը շատ մեծ է արևի ուլտրամանուշակագույն ճառագայթների ազդեցությունը, որոնք հանգեցնում են օրգանիզմում ազատ ռադիկալների առաջացմանը: Դրանք ունեն օնկոգեն ազդեցություն և կարող են առաջացնել չարորակ ուռուցքներ»,- զգուշացնում է սննդաբանը՝ խորհուրդ տալով ընդունել հակաօքսիդանտ նյութեր պարունակող սնունդ, որը պաշտպանում է կենդանի օրգանիզմներն «ազատ ռադիկալների» վնասակար ազդեցությունից: Այդպիսիք են բնական բուսական կերակուրը՝ մրգեր հատապտուղներ, բանջարեղեն: Իսկ օրգանիզմի համար անհրաժեշտ վիտամին Դ ստանալու համար բավական է զբոսնել առավոտյան մինչև ժամը 10:00-ն կամ 11:00-ն:

Ամռան շոգին մարդու առողջությանը սպառնացող մյուս վտանգը ջրազրկումն է, որից խուսափելու համար մասնագետները հորդորում են օրական ընդունել մոտ 3 լիտր մաքուր ջուր: «Հայերի մոտ մեծ տարածում ունեցող թեյը և սուրճը, լինելով օգտակար, միաժամանակ նպաստում են ջրազրկմանը: Մեկ բաժակ սուրճը կամ թեյը օրգանիզմից հանում է երկու բաժակ ջուր: Ուստի այդ ըմպելիքների յուրքանչյուր բաժակի յուրացումից հետո պետք է խմել երկու բաժակ ջուր»,- ասաց սննդաբանը՝ ընդգծելով, որ օրգանիզմի ջրազրկումն առավել վտանգավոր է երեխաների համար: Երեխաներն ավելի շարժուն են, որ ի հետևանքով ավելի շուտ են ջրազրկվում:

Հասմիկ Աբովյանը խորհուրդ է տալիս տարվա բոլոր եղանակներին խուսափել հյութերի օգտագործումից, որոնք շաքարային դիաբետի և ավելորդ քաշի վտանգ են ներկայացնում: «Հյութերը չունեն այն կարևորագույն բջջանքը, որն առկա է մրգերում և մարդու օրգանիզմի համար ամենաանհրաժեշտ մթերքն է»,- բացատրեց նա:

Իսկ սննդի չարաշահումներից ու սխալների դեպքում լուրջ թունավորումներից զերծ մնալու համար սննդաբանը նշում է, որ պետք է շուտ-շուտ ուտել (օրական՝ 5-7 անգամ), սակայն փոքր չափաբաժիններով: Ամռան շոգ ամիսներին պակասեցնել մսամթերքի օգտագործումը, այն փոխարինելով սպիտակուց պարունակող այլ սննդով: