Ցեղասպանության հարցում պատմական իրականության ճիշտ կողմում ենք. Կանադայի պաշտպանության նախարար

Կանադայի ազգային պաշտպանության և բազմամշակութայնության հարցերով նախարար, Պահպանողական կուսակցության անդամ Ջեյսոն Քենին վերահաստատել է իր կուսակցության հանձնառությունը Հայոց ցեղասպանության հարցում արդար պայքար մղելու վերաբերյալ: Այս մասին Քենին խոսել է Տորոնտոյում Հայ-կանադական պահպանողական ասոցիացիայի (ACCA) կազմակերպած երեկոյի ընթացքում:

«Մեր Պահպանոեղական կուսակցությունը, անկախ քաղաքական ճնշումներից, կշարունակի հաստատակամորեն մնալ Հայոց ցեղասպանության հարցում պատմական իրականության ճիշտ կողմում»,- «Արմենպրես»-ի փոխանցմամբ' նշել է Քենին: Նա ընդգծել է նաև Պահպանողական կուսակցության կողմից Մերձավոր Արևելքի կրոնական և էթնիկ փոքրամասնությունների ոտնահարված իրավունքները պաշտպանելու պատրաստակամությունը:

Երեկոյի ընթացքում Կանադայի հայկական ազգային հանձնաժողովի (ANCC) գործադիր տնօրեն Արիս Բաբիկյանը շնորհակալություն է հայտնել Կանադայի իշխող Պահպանողական կուսակցությանը հայ ժողովրդի և Կանադայում հայկական համայնքի ներկայացուցիչների նկատմամբ ցուցաբերած վերաբերմունքի ու մշտական աջակցության համար: Նա առանձնահատուկ կերպով կարևորել է Կանադայի կողմից Հայոց ցեղասպանության ճանաչումը և այդ ճանաչումը վերահաստատող բանաձևի ընդունումը 2015 թվականին:

Կանադայի խորհրդարանը 1996 թվականի ապրիլի 23-ին Հայոց ցեղասպանությունը դատապարտող բանաձև է ընդունել: 2002 թվականին Հայոց ցեղասպանությունը ճանաչելու մասին բանաձև է ընդունել Կանադայի Սենատը, իսկ արդեն 2004 թվականին Կանադայի խորհրդարանի հանրային պալատը ճանաչել է Օսմանյան Թուրքիայի կողմից իրագործած Հայոց ցեղասպանությունը: 2015 թվականին Կանադայի Սենատը վերահաստատել է դիրքորոշումը Հա յոց ցեղասպանությունը ճանաչելու հարցում' վերահաստատելով 2002 թվականի հունիսին ընդունած բանաձևը: