Սիրիայի իշխանական և ընդդիմադիր ուժերը համաձայնվել են Զաբադանիում կրակի դադարեցման հարցի շուրջ

Սիրիայի զինված ուժերը և ընդդիմադիրները համաձայնության են եկել երկու օրով Զաբադանիում, ինչպես նաև Իդլիբի նահանգի երկու շիական գյուղերում ռազմական գործողությունների դադարեցման մասին: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, կրակի դադարեցումը պետք է մեկնարկի վաղ առավոտյան' ժամը 6-ին: Տեղեկությու ններ կան, որ կրակը կդադարեցնի նաև լիբանանյան «Հըզբոլլահը»:

Զաբադանին գտնվում է Դամասկոսից 45 կիլոմետր հարավ-արևմուտքում, որտեղ ռազմական լայնածավալ գործողությունները սկսվել են հուլիսի 4-ից: Հիմնական պայքարը մղվում է «Ջաբհա ան Նուսրա» և «Ահրար աշ Շամ» խմբավորումների դեմ: Աղբյուրը նաև տեղեկացնում է, որ Սիրիական ազատ բանակի անդամներ են հանձնվել կամ անցել կառավարական ուժերի կողմը: Քաղաքը շրջափակված է երեք կողմերից' արևմուտքից, հարավից ու արևելքից:

Նախօրեին տեղեկություններ էին ստացվել, որ սիրիական բանակն ու «Հըզբոլլահը» Զաբադանիում 11 շինություններ են ազատագրել և առաջ են ընթանում դեպի քաղաքի կենտրոն:

Սիրիական բանակն ավելի քան չորս տարի անընդմեջ պայքար է մղում տասնյակ զինված խմբավորումների դեմ՝ փորձելով երկրում վերականգնել կայունությունն ու անվտանգությունը: ՄԱԿ-ի տվյալներով, սիրիական հակամարտության ընթացքում զոհերի թիվը գերազանցել է 220հազարը: