Գառնիի գյուղապետը տուգանվել է ոչ իրավաչափ վարչական ակտ կայացնելու պատճառով

Կոտայքի մարզի ընդհանուր իրավասության դատարանը Գառնի համայնքի ղեկավար Աշոտ Վարդանյանին 400 հազար դրամ տուգանելու վճիռ է կայացրել' հիմնավորված համարելով հայցվոր կողմի' «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի հայցն այն մասին, որ համայքնի ղե կավարի ոչ իրավաչափ վարքագծի և կայացրած ոչ իրավաչափ վարչական ակտի պատճառով խախտվել է հայցվոր կողմի իրավունքներն ու օրենքով պաշտպանվող շահերը: «Աշոտ Վարդանյանի պնդումները, թե «ամառային սրճարանի կառուցումը կասեցնելու համար» է տուգանվել, անհեթեթություն է»,-«Արմենպրես»-ի թղթակցի հետ զրույցում ասաց ՊՈԱԿ-ի հասարակայնության ու լրատվության հետ կապերի բաժնի վարիչ Մարինե Ավանեսյանը:

Նրա խոսքով, Գառնի արգելոց-թանգարանի տարածքում հնագետների բազայի հարևանությամբ սեզոնային սրճարանի տեղադրման առիթով Աշոտ Վարդանյանը 2014 թ. փետրվարի 27-ին թիվ 19 որոշմամբ ընդունել էր վարչական ակտ, համաձայն որի, առանց իր կողմից շինթույլտվության տալու ՊՈԱԿ-ը իրականացրել է շինարարություն և 400 հազար դրամ վարչական տույժի որոշում էր կայացրել ՊՈԱԿ-ի տնօրենի նկատմամբ:

Մարինե Ավանեսյանի խոսքով, գյուղապետի որոշումն անհիմն էր, անօրինական, քանի որ ոչ հիմնական շինության տեղադրման կարգը սահմանված է ՀՀ կառավարության 2001 թ. սեպտեմբերի 24-ի որոշմամբ և թույլտվությունը, ըստ օրենսդրության, տալիս է ոլորտի լիազոր մարմինը:

«Անկախ հանգամաքնից սեզոնային սրճարանը տեղադրվեց, թե ոչ, Աշոտ Վարդանյանն այս հարցում որեւէ լիազորություն, իրավասություն չունի: Թե ինչու է նորից տպագիր ու էլեկտրոնային մամուլում աղմուկ բարձրացրել Վարդանյանն անհասկանալի է, մանավանդ իր իսկ ձևակերպմամբ' նա դատարանի վճռի խոնարհ ծառան է»,-նշեց Ավանեսյանը: