Սահմանապահ Այգեհովիտում տեղադրվեց սակրավոր, «Մարտական խաչ»-ի շքանշանակիր Գեորգի Մնացականյանի հուշախաչը

Տավուշի մարզի Այգեհովիտ գյուղի վարչական տարածքում գտնվող Կայանավան բնակավայրում սակրավորի օրը նշանավորվեց Հայոց բանակի զինծառայող, սակրավորների գումարտակի հրամանատար, կապիտան, հետմահու «Մարտական խաչ երկրորդ աստիճան» շքանշանի արժանացած Գերոգի Մնացականյանի հուշախաչը: «Արմենպրես»-ի տեղեկացմամբ' հերոսի հիշատակը հավերժացնող խաչը տեղադրվել է նրա զոհվելու վայրին շատ մոտ հ ակառակորդի հետ շփման գծում, որտեղ անհանգիստ էր նույնիսկ հանդիսության ընացքում. հակառակորդը տարբեր տրամաչափի զենքերից արձակած կրակոցներով խանգարում էր թե միջոցառումը, թե բնակավայրի առօրյան, ինչի պատճառով միջոցառումը հուշախաչի տարածքից տեղափոխվեց Կայանավանի դպրոցի շենք: Հուշախաչի բացման արարողությանը մասնակցում էին Գեորգի Մնացականյանի ծնողներն ու հարազատները, Գեղարքունիքի մարզի Գավառի տարածքային զինկոմիսարիատի պատասխանատու աշխատակիցներ, ԵԿՄ անդամներ, արցախյան ազատամարտի վետերաններ, Տավուշի մարզպետի տեղակալ Լեւոն Սարգսյանը, Այ գեհովիտի գյուղապետ Լեւոն Գրիգորյանը, Տավուշի սահմանամերձ զորամասի զինծառայողներ: Բացելով հուշախաչը' Տավուշի մարզպետի տեղակալ Լեւոն Սարգսյանը նշեց, որ Գեորգի Մնացականյանի սխրանքն անմահ է, որն այսօր հավերժանում է եւս մեկ հուշանկյունով, որն այսուհետ սրբատեղի է դառնալու ոչ միայն հերոսի հարազատների, այլ նաեւ նրա մարտական ընկերների, Տավուշի եւ Գեղարքունիքի մարզերի բնակչության, բոլոր հայրենասեր մարդկանց համար: Մարզպետի տեղակալի ներկայացմամբ' Գավառ քաղաքում ծնված ու հասակ առած Գեորգի Մնացականյանը 2013 թվականի հոկտեմբերին հերոսի մահով է ընկել հակառակորդի հետ շփման գծում ծառայողական պարտականությունները կատարելիս' Կայանավանի տարածքում' իր մահով փրկելով ծառայակից ընկերների կյանքը:Գեորգիի կորուստը միայն Գագիկ եւ Անահիտ Մնացականյանների, Գավառի բնակիչների կորուստը չէր, այլ նաեւ Տավուշի մարզի, համայն հայության համար թանկագին կորուստ էր»,-նշեց Լեւոն Սարգսյանը:

Հուշախաչի օծման կարգը կատարեց Իջեւանի տարածքի հոգեւոր հովիվ Տեր Սեմեոն քահանա Առաքելյանը:«Մենք պարտավոր ենք հիշատակել Գեորգիի սխրագործությունը եւ այն փոխանցել գալիք սերունդներին, որպեսզի նրանք էլ բռնկվեն հայրենասիրության կրակով, Գեորգիի նման կանգնեն մեր խաղաղությունը խաթարող թշնամու դեմ: Թող Աստված պահապան լինի մեր բոլոր զինծառայողներին, ովքեր ողջ ճակատով մեկ անսանսան կանգնած են հայրենի երկրի պաշտպանության դիրքերում»,-նշեց Տեր-Սեմեոն քահանա Առաքելյանը: «Մենք հոգու անհուն ցավ ենք ապրում, որ մեր կողքին չէ Գեորգին, դարձել է հուշ, սակայն հպարտ ենք մեր ընտանիքով ու գերդաստանով, որ նման հերոս ենք սնել ու մեծացրել: Այսուհետ այս խաչը մեզ համար դառնում է սրբավայր, ուր կայցելենք հաճախակի եւ կթեթեւացնենք մեր վշտահար սրտերը»,-նշեց Գեորգիի հայրը' Գագիկ Մնացականյանը:

«Հուշախաչի տեղադրման վայրը շատ մոտիկ է այն վայրին որտեղ զոհվեց Գեորգին: Նրան ոչ միայն մեծարում են Գեղարքունիքում, այլ նաեւ Տավուշում: Այս հուշախաչը միջոց է' հերոսի անունն ավելի բարձր, հարատեւ պահելու: Հուշախաչը պատրաստվել եւ տեղադրվել է Տավուշի մարզպետ Հովիկ Աբովյանի նախաձեռնությամբ եւ միջոցներով»,-նշեց Տավուշի մարզի գլխավոր ճարտարապետ Միսաք Մելքոնյանը:

Հակառակորդի կրակոցների վտանգավորությունից ելնելով' միջոցառումը տեղափոխվեց Կայանավանի դպրոցի շենք, որտեղ Գեորգի Մնացականյանի սխրանքի մասին չափածո տողեր ու գովերգեր հնչեցրին Կայանավանի եւ Գավառ քաղաքի Գեորգի Մնացականյանի անվան թիվ 7 միջնակարգ դպրոցների աշակերտները: Արցախյան ազատամարտի վետերան, ԵԿՄ անդամ Հովհաննես Միրիբյանը ԵԿՄ նախագահ Մանվել Գրիգորյանի անունից ԵԿՄ պատվոգրերով պարգեւատրեց Տավուշի մարզպետ Հովիկ Աբովյանին, մարզպետարանի մի խումբ պատասխանատու աշխատակիցների, Այգեհովիտի համայնքի ղեկավարին եւ Կայանավանի դպրոցի տնօրենին: «Արցախյան գոյամարտը մենք շահեցինք Գեորգիի նման տղաների անձնազոհության շնորհիվ, իսկ հրադադարից ի վեր մեր մեծ հայրենիքի այդ վերագտնված պատառ հողի յուրաքանչյուր թիզը պահպանում ենք մերօրյա հերոս զինվորների ու հրամանատարների նվիրվածության արդյունքում: Խոնարհվում ենք բոլորի անձնազոհության ու կամքի առաջ»,-շեշտեց Հովհաննես Միրիբյանը:

Գեորգի Մնացականյանի հարազատները, համաքաղաքացիները եւ Տավուշի մարզի պաշտոնատար անձինք, Այգեհովիտի եւ Կայանավանի բնակիչները, զինծառայող ընկերները խոստացան' հաճախակի դարձնել փոխայցելությունները, շփումները' հանուն այն վեհ նպատակների, ինչի համար իր կյանքը 25 տարեկան հասակում զոհել է Գեորգին: «Գեորգիի կիսանդրին տեղադրվելու է նրա անունը կրող դպրոցի բակում, հատուկ միջոցառում է տեղի ունենալու, որին մասնակցելու համար սիրով կհրավիրեմ բոլորիդ»,- հայտարարեց հերոսի հայրը:»Շատ կուզենք, որ Գեորգիի կիսանդրու բացմանն ու ոգեկոչմանը ներկա գտնվեն մեր դպրոցի աշակերտները, որոնց շուրթերին այսօր այնքան բարձր հնչեց իրենց սիրելի հերոսի անունը, որոնց աչքերն այսօր արցունքոտվում էին ամեն մի բառից: Անպատճառ, գալու ենք' խոնարհվելու մեր հերոսի փառքի ու սխրանքի առջեւ»,- հավաստեց Այգեհովիտի գյուղապետ Լեւոն Գրիգորյանը: