Իսրայելից հետո Եվրոպան էլ է հրաժարվում ադրբեջանական նավթից

Շուկաներից ստացված տեղեկությունների համաձայն' արեւմտյան Աֆրիկայից նավթի մատակարարումների մեծացման հետ կապված կնվազեն Եվրոպայի տարբեր երկրներից, այդ թվում' Ադրբեջանից գնվող Azeri Light եւ CPC Blend նավթի վաճառքի ծավալները:

Այս մասին, ինչպես հաղորդում է «Արմենպրես»-ը, հայտնում է ամերիկյան Platts անկախ տեղեկատվական գործակալությունը, որը հանդիսանում է աշխարհում էներգետիկ արդյունաբերության վերաբերյալ ամենահեղինակավոր տեղեկատվական աղբյուրներից մեկը:

Ուշադրության դարձնելով Ասիայում արեւմտաաֆրիկյան նավթի պահանջարկի նվազմանը եւ փոխադրման հարմար երթուղուն' եվրոպական նավթավերամշակող ընկերությունները որոշել են սեպտեմբերին չմշակված նավթի օրական մոտ 1,6 մլն բարել լրացուցիչ մատակարարումներ (50 մլն բարել) ընդունել Նիգերիայից եւ Անգոլայից:

Նավթի այդ չնախատեսված հոսքն իր հերթին փոխել է նավթի ավանդական տեսակների վերջնական օգտատերերի պահանջարկի պարամետրերը, ինչը կբերի օգտագործվող նավթի տեսակների, հատկապես' ադրբեջանական Azeri Light նավթի տեսակի պահանջարկի նվազմանը:

Չորեքշաբթի CIF պայմաններով մատակարարվող ադրբեջանական նավթի բեռը գնահատվել էր մեկ բարելի դիմաց Brent+1,70 դոլար, այսինքն' ադրբեջանական նավթի եւ Brent նավթի գնի տարբերությունը նախորդ մակարդակից մեկ բարելի համար կազմել էր 2,30 դոլար, հասնելով 44,34 դոլարի:

Փորձագետները նշում են, որ նման իրավիճակը զարգանում է համաշխարհային շուկաներում առաջարկի շարունակվող աճի ֆոնին, այն դեպքում, երբ պահանջարկը չի մեծանում: Մասնավորապես, նվազել է Արեւմտյան Աֆրիկայում Հնդկաստանի կողմից նավթի գնումները, որը սովորաբար ներմուծում էր ամսական մոտ 8-12 մլն բարել: Նվազել է նաեւ նավթի պահանջարկը Չինաստանում, որը սովորաբար գնում էր արդյունահանվող անգոլական նավթի մոտ 40-50 տոկոսը:

Նավթի առեւտրով զբաղվողները հայտնում են, որ արեմտյան Աֆրիկայում նավթի մնացած մասն անմիջապես կգնեն եվրոպացիները: Փորձագետների կարծիքով' Անգոլան եւ Նիգերիան սեպտեմբերին հարկադրված կլինեն իրենց հայացքն ուղղել Եվրոպային: Նման թվով այլընտրանքային աղբյուրների դեպքում նավթի գներն անշեղորեն կջջնեն, գտնում են Platts գործակալության վերլուծաբանները:

Մի քանի օր առաջ The Financial Times թերթն արդեն հայտնել էր մայիսի սկզբից մինչեւ օգոստոսի 11-ը Իսրայելի կողմից իրաքցի քրդերից 19 մլն բարել նավթ գնելու մասին, որի արժեքը համաշխարհային գներով կազմել է գրեթե 1 մլրդ դոլար:

«Ինչպես հայտնի է, Իսրայելն ավելի վաղ նավթը հիմնականում գնում էր Ադրբեջանից, Ղազախստանից եւ Ռուսաստանից: Իսկ այժմ 3,5 ամիս առաջ երեք քառորդով ավելի ապահովել է իրեն քրդական նավթով: Այսպիսով, համաշխարհային շուկայում նավթի գերավելցուկը բերել է նրան, որ Իսրայելից հետո Եվրոպան էլ է կրճատում Ադրբեջանից նավթի գնումները», - գրում է «Ազադլըգ»-ը: