Արտոնյալ վարկեր` արտոնյալ երկրի համար

Երեկ Սերժ Սարգսյանը Ռուսաստանի Դաշնություն աշխատանքային այցի շրջանակներում Մոսկվայում հանդիպել էր ՌԴ Նախագահ Վլադիմիր Պուտինի հետ: Հանդիպումից հետո հայտարարվեց, որ ստորագրվել է Հայաստանին 200 միլիոն ԱՄՆ դոլար արտոնյալ վարկ տրամադրելու համաձայնագիր, և դա թույլ կտա թարմացնել հայկական զինված ուժերի զինանոցը:

ԼՈւՐԵՐ.com-ի թղթակցի հետ զրույցում տնտեսագետ Մեսրոպ Առաքելյանը նկատեց, որ այդ վարկը տնտեսության վրա որևիցե ազդեցություն չի ունենա, քանի որ նախատեսված է բանակի սպառազինության համար:

«Եթե հաշվի առնենք, որ ՌԴ-ն մեր հիմնական ռազմական գործընկերն է և սպառազինության մեջ մեծ ներդրում ունի, նորմալ եմ գնահատում, որ Ռուսաստանի հետ ռազմական հարաբերությունների շրջանակններում ակտիվություն է դրսևորվում»,- ասաց տնտեսագետը:

Մեր զրուցակիցը հիշեցրեց նաև կարևոր մի համագործակցություն, ըստ որի, կվերազինվի Հայաստանի ատոմային էլեկտրակայանը: Նշենք, որ շահագործումը երկարաձգելու նպատակով մոտ 4 ամիս առաջ համաձայնագրեր են կնքվել Ռուսաստանի կառավարության հետ՝ ակնկալելով 270 միլիոն դոլարի վարկ և 30 միլիոնի դոլարի դրամաշնորհ: 

«Ատոմակայանի վերազինման հարցը բավականին արդիական է, քանի որ ատոմակայանն ապահովում է Հայաստանի համար ամենաէժան հոսանքը: Կարծում եմ՝ ատոմակայանի վերազինումը և էլեկտրաէներգիայի արտադրանքի ծավալների ավելացումն առաջիկա տարիներին գոնե կզսպի էլեկտրաէներգիայի թանկացումը»: