«Հովնանյան Ինթերնեյշնլ» ՍՊԸ-ն կյանքի կկոչի Վահագն Հովնանյանի բոլոր ձեռնարկները

«Հովնանյան Ինթերնեյշնլ» ընկերությունը հանդես է եկել հայտարարությամբ եւ Հովնանյանների ընտանիքի անունից շնորհակալություն հայտնել այն բոլոր անձանց, ովքեր իրենց ցավակցություններն ու զորակցությունն են հայտնել մեծ բարերարի մահվան կապակցությամբ և այդ ծանր պահին գտնվել են իրենց կողքին:

Ընկերության տարածած հաղորդագրության մեջ, մասնավորապես, ասվում է, որ Վահագն Հովնանյանի զավակները՝ Նինա-Գայանե և Շանթ Հովնանյանները գիտակցում են այն մեծ պատասխանատվությունը, որը կապված է մեծ հայրենասերի նախաձեռնած ծրագրերի հետագա շարունակականությունը ապահովելու հետ:

«Վահագն Հովնանյանի հիմնադրած «Հովնանյան Ինթերնեյշնլ» ՍՊԸ-ի ամբողջ անձնակազմը՝ ընկերության տնօրեն Նինա-Գայանե Հովնանյանի գլխավորությամբ (որն այդ պարտականությունները ստանձնել է 2014թ.-ից) հավաստիացնում է, որ շարունակելու է կյանքի կոչել Վահագն Հովնանյանի նախաձեռնած բոլոր ձեռնարկները (ինչպես Վահագնի թաղամասի հետագա կառուցապատումն ու զարգացումը, այնպես էլ մյուս ծրագրերի իրականացումը): Վստահ ենք, որ միայն այդ ճանապարհով կարող ենք միշտ վառ պահել Վահագն Հովնանյանի հիշատակը»,- նշվում է հաղորդագրության մեջ:

Օգոստոսի 31-ին 83 տարեկան հասակում կյանքից հեռացել է մեծ բարերար Վահագն Հովնանյանը:

Վահագն Հովնանյանը ծնվել է 1932թ. փետրվարի 16-ին Իրաքում: 1959թ. հիմնել է (եղբայրների հետ) «Հովնանյան եղբայրներ» կորպորացիան (եղել է փոխնախագահ), 1969թ.՝ սեփական անշարժ գույքի շինարարության («Hovhit») ընկերությունը։ Գործունեության ծավալների աճելուն պես, ընկերությունը ճյուղավորվեց եւ ստեղծվել են մի քանի դուստր ընկերություններ՝ «V.S. Hovnanian Group», «Adelfia Water Company», «Adelfia Sewer Company», «Hovnanian Realty», «Clear Title Agency» եւ «Grandview Cable»։ 1985 թվականին Հովնանյանը որդու՝ Շանթի հետ նախաձեռնեց հաճախականության լայն ընդգրկումով հեռահաղորդակցության ընկերություն, հիմնելով «Cellular Vision» կորպորացիան, որը հետագայում վերանվանվեց «SpeedUS» կորպորացիայի։ «Հովնանյան Ինթերնեյշնլ» (1998 թվականից) եւ «Հովնանյան Գրուպ» ընկերությունների նախագահն է: Վահագն Հովնանյանի բարեգործական ծրագրերը նպատակաուղղված են հայ մշակույթի զարգացմանն ու պահպանմանը, նաեւ Հայաստանում տուրիզմի զարգացմանը։ Կնոջ՝ Հասմիկ Հովնանյանի հետ 1976 թվականին Նյու Միլֆորդ քաղաքում (Նյու Ջերսի նահանգ) հիմնել է հայկական դպրոց, նպաստել է ԱՄՆ-ի հյուսիս-արլեւելյան հայ համայնքի կրթական, կրոնական եւ մշ ակութային խնդիրների լուծմանը։

2000 թվականին ՀՀ-ում հիմնել են Սայաթ-Նովայի անվան, 2002 թվականին՝ «Վահագն» մրցանակաբաշխությունները։ 2001 թվականի մայիսին ստեղծել է Հայկական տուրիզմի զարգացման գործակալությունը (ՀՏԶԳ)։

Ռիջֆիլդ քաղաքի (Նյու Ջերսի նահանգ) Սուրբ Վարդանանց եկեղեցու հոգաբարձուների խորհրդի նախագահ, Ամերիկա-Իսրայել բարեկամության խորհրդի անդամ էր։

1998թ. Երեւանում կառուցել է Վահագնի թաղամասը: