Կյանքից հեռացել է բժիշկ-համաճարակագետ Ալբերտ Մայրապետյանը

Կյանքից հեռացել է Հայաստանի Հանրապետության առողջապահության նախկին փոխնախարար, բժիշկ-համաճարակագետ, հիգիենիստ, առողջապահության կազմակերպիչ, բժշկական գիտությունների դոկտոր, պրոֆեսոր Ալբերտ Խաչատուրի Մայրապետյանը: Ալբերտ Մայրապետյանի հոգեհանգիստը տեղի կունենա սեպտեմբերի 13-ին' ժամը 18:00-ին, Կոնդի Սուրբ Հովհաննես Մկրտիչ եկեղեցում: Վերջին հրաժեշտը' սեպտեմբերի 14-ին' ժամը 13-ին՝ նույն վայրից:

Ալբերտ Մայրապետյանը ծնվել է 1931թ․ դեկտեմբերի 24-ին Նոր Բայազետում (այժմ ք. Գավառ)։ 1954թ. ավարտել է Երևանի բժշկական ինստիտուտը։ 1954-64-ին աշխատել է Կամոյի շրջանում'որպես շրջանային համաճարակագետ և շրջանային հիվանդանոցի ինֆեկցիոն բաժանմունքի վարիչ: 1964-69թթ. աշխատել է Մարտունու շրջանում' որպես շրջանային բուժմիավորման գլխավոր բժիշկ:

1969-1991թթ. կառավարության որոշմամբ տեղափոխվել է աշխատանքի Առողջապահության նախարարություն' որպես սանիտարահամաճարակային վարչության պետ և կոլեգիայի անդամ, այնուհետև առողջապահության փոխնախարար և հանրապետության պետական գխավոր սանիտարական բժիշկ:

1991-ին նշանակվել է Շրջակա միջավայրի հիգիենայի և կանխարգելիչ թունաբանության ԳՀԻ տնօրեն:

Համաճարակաբան, հիգիենիստ, առողջապահության հմուտ կազմակերպիչ Ալբերտ Մայրապետյանը մեծ ներդրում է ունեցել բնակչության շրջանում առողջ կենցաղի արմատավորման, մեր երկրում վարակիչ հիվանդությունների դեմ պայքարի ու կանխարգելման, շրջակա միջավայրի առողջացման գործում: Միաժամանակ ծավալել է գիտական գործունեություն՝ հեղինակելով 200 գիտական աշխատություն։ Դոկտորական ատենախոսությունը պաշտապանել է 1998-ին:

Ալբերտ Մայրապետյանը Հայկական բժշկական և ռուսական ակադեմիաների ակադեմիկոս էր: Առողջապահության ոլորտին մատուցած ծառայությունների համար նա արժանացել է կառավարական մի շարք պարգևների: Պատվո նշանի շքանշանակիր է, Լոմոնոսովի ոսկե մեդալակիր: