Գործատուների նորաստեղծ ցանցը կխթանի հաշմանդամություն ունեցող անձանց աշխատաշուկայի զարգացումը

Հաշմանդամություն ունեցող մարդկանց խնդիրների լուծման հարցում շատ կարևոր է պետություն և մասնավորի համագործակցությունը: Այս մասին սեպտեմբերի15-ին Սոցիալական ձեռնարկությունների և գործատուների ցանցի հիմ նման պաշտոնական արարողությանն ասաց ՀՀ աշխատանքի և սոցիալական հարցերի նախարար Արտեմ Ասատրյանը: Ցանցը կդառնա մի հարթակ, որտեղ հնարավոր կլինի խթանել Հայաստանում սոցիալական ձեռնարկությունների զարգացումը, հանդես գալ հանուն շահավետ հարկային քաղաքականության հաստատման, իրականացնել ֆոնդերի հայթայթում և այլն:

«Սա դրա առարկայական օրինակներից է, երբ պետությունը, մանավանդ վերջին տարիներին, իր օրենսդրական նախաձեռնություններում առարկայացրել է այն բոլոր ուղղությունները, որոնք անհրաժեշտ են հաշմանդամություն ունեցող անձանց' հասարակություն ինտեգրվելու համար: Քայլ առ քայլ, խնդիրներին լուծումներ տալով' գնում ենք առաջ», - «Արմենպրես»-ի փոխանցմամբ' ասաց Արտեմ Ասատրյանը:

Նախարարը կարևորեց նաև հաշմանդամություն ունեցող անձանց խնդիրներով զբաղվող հասարակական կազմակերպությունների և հենց անձանց ներգրավվածությունը խնդիրների լուծմանը, քանի որ առանց իրենց ակտիվ մասնակցության այդ խնդիրները չեն կարող առարկայական լուծում ունենալ: Արտեմ Ասատրյանը նաև հիշեցրեց, որ 2016թ. կառավարության որոշմամբ հայտարարվել է Հավասար հնարավորությունների ապահովման տարի, որի շրջանակներում հաստատվել է առարկայական միջոցառումների ծրագիր:

«Արդեն տևական ժամանակ է, ինչ ԱՄՆ Միջազգային զարգացման գործակալության կողմից աջակցություն ստացող Life ծրագրի շրջանակներում 18 սոցիալական ձեռնարկությունների ղեկավարները համագործակցում են ոչ պաշտոնական ցանցի շրջանակներում՝ տարածելով իրենց փորձն ու սովորելով միմյանցից», - ասաց «Սեյվ դը չիլդրեն» կազմակերպության հայաստանյան ներկայացուցչության տնօրեն Արսեն Ստեփանյանը:

2012 թ. սկսված «Լայֆ» ծրագիրը հիմնել կամ ընդլայնել է 18 «սոցիալական ձեռնարկություն»՝ աշխատանքով ապահովելով 210 հաշմանդամություն ունեցող անձանց: Իսկ ցանցի պաշտոնական հիմնադրմամբ նրան կմիանա նաև OxYGen անկախ զարգացման հիմնադրամին իր 22 կոոպերատիվներով:

«Հաշմանդամություն ունեցող անձինք կարողանում են դառնալ հասարակության լիիրավ անդամներ միայն սոցիալական ինտեգրման, դասընթացների, հմտությունների զարգացման հնարավորությունների մատչելիության և իրենց իրավունքները պաշտպանող օրենքների կիրառման դեպքում», - ասաց ՀՀ-ում ԱՄՆ դեսպանատան Տնտեսական և քաղաքական բաժնի ղեկավար Մեթյու Յուսնը:

«Լայֆ» ծրագիրն իրականացվում է «Սեյվ դը չիլդրեն»-ի կողմից: Եթե ծրագրի առաջին փուլն իրականացվում էր Երևանում և չորս մարզերում, ապա ներկայիս փուլն ընդգրկում է Հայաստանի ողջ տարածքը: Ծրագրի անմիջական շահառուներ են 18-64 տարեկան հաշմանդամություն ունեցող անձինք: Ծրագրի գործընկերներն են «Ակտիվա» միջազգային հիմնադրամը, «Ունիսոն» ՀԿ-ն, «Էյջ-Դի-Փի» հիմնադրամը և «Լիարժեք կյանք» ՀԿ-ն: Ծրագիրը սերտորեն համագործակցում է ՀՀ աշխատանքի և սոցիալական հարցերի նախարարության, Զբաղվածության պետական գործակալության, տեղա կան և մարզային իշխանությունների, զբաղվածության կենտրոնների, միջին մասնագիտական կրթական հաստատությունների, գործատուների, ՀՈՒԱԿ-ների, ՀԿ-ների, հաշմանդամություն ունեցող անձանց, ծառայություններ մատուցողների և այլոց հետ: