«Հրանտ Դինք» միջազգային մրցանակը գտել է իր տերերին

Ստամբուլի հայկական «Ակոս» պարբերականի նախկին խմբագրապետ Հրանտ Դինքի ծննդյան օրը' սեպտեմբերի 15-ին, կայացել է «Հրանտ Դինք» ամենամյա միջազգային մրցանակաբաշխությունը: Ինչպես հաղորդում է «Արմենպրես»-ը' վկայակոչելով «Ակոս» պարբերականը, արդեն յոթերորդ տարին անընդմեջ իրականացվող մրցանակաբաշխության ժամանակ մրցանակները հանձնվել են Սաուդյան Արաբիայից կնոջ իրավունքների պաշտպան Սամար Բադավիին և Թուրքիայում արդեն 20 տարի շարունակ ԼԳԲՏ-ների իրավունքների համար պայքարող Kaos GL խումբը:

Սամար Բադավին երկրից դուրս գալու արգելքի պատճառով չի կարողացել ներկա գտնվել մրցանակաբաշխությանն ու անձամբ վերցնել մրցանակը: Նա իր երկրում ակտիվ պայքար է տանում մասնավորապես կանանց' մեքենա քշելու և քվեարկելու իրավունքը ճանաչելու համար:

Թուրքիայից մրցանակի արժանացած Kaos GL խմբի անունից հանդես է եկել խմբի ներկայացուցիչ Ալի Էրօլը, ով նշել է. «Առանց խտրականության և ազգայնականության դեմ պայքար տանելու հոմոֆոբիայի դեմ մեր պայքարը հաջողություն չի կարող ունենալ»: Նա կոչ է արել բացել Հայաստանի հետ սահմանը և դադարեցնել սպառնալ Թուրքիայում գտնվող հայերին արտաքսել, իսկ փոխարենը նրանց տալ բնակության և աշխատանքի թույլտվություն:

«Հրանտ Դինք» միջազգային մրցանակն ամեն տարի հանձնվում է երկու մարդու կամ կազմակերպության, ովքեր Թուրքիայում կամ երկրից դուրս պայքարում են խտրականությունից, ռասիզմից և բռնությունից զերծ աշխարհի համար, սեփական իդեալների համար պատրաստ են ռիսկի գնալ, օգտագործում են խաղաղության լեզուն և նման կերպ խրախուսում են և ոգեշնչում մյուսներին:

«Հրանտ Դինք» հիմնադրամի կողմից կազմակերպվող ամենամյա մրցանակաբաշխությունը նպատակ ունի ցույց տալու, որ սեփական իդեալների համար պայքարող մարդկանց ձայնը լսելի է, նրանց աշխատանքը' տեսանելի, և նրանք միայնակ չեն:

Ստամբուլահայ լրագրող, «Ակոս» պարբերականի հիմնադիր և գլխավոր խմբագիր Հրանտ Դինքը սպանվել էր թուրք ազգյանականների կողմից 2007 թվականի հունվարի 19-ին: