«Լրագրողներ առանց սահմանների»-ն հորդորել է Թուրքիայի իշխանություններին դադարեցնել գրաքննությունը

Միջազգային «Լրագրողներ առանց սահմանների» (Reporters Without Borders) կազմակերպությունը հայտարարություն է հրապարակել' հայտնելով իր խորը մտահոգությունները Թուրքիայում մամուլի նկատմամբ իրականացվող գրաքննության դեպքերի առնչությամբ: Ինչպես հաղորդում է «Արմենպրես»-ը, կազմակերպությունը նշել է, որ այնպիսի գործողությունները, ինչպես, օրինակ, «Դողան» մեդիահոլդինգի դեմ սկսված հետաքննությունը, «Նոքթա» ամսագրի խմբագրության վրա ոստիկանության հարձակումը կամ «Ջումհուրիեթ» թերթի ինտերնետային կայքի արգելափակումը, երկրում գրաքննության մասշտաբներն ավելի են ընդլայնում:

«Գրաքննության այս ալիքը անհանդուրժող է, հակասահմանադրական և խախտում է կառավարության միջազգային բոլոր պատավորվածությունները: Նմանօրինակ քայլերը ոչ միայն սահմանափակում են մեդիայի ազատությունը, այլև մեծացնում են լարվածությունը և խորացնում են հասարակության մեջ առկա տարանջատումը: Մենք կոչ ենք անում իշխանություններին դադարեցնել իրադրությունն ավելի վատացնելու քաղաքականությունը և փոխարենն օգնել' թույլ տալով ժողովրդավարական քննարկումները»,- նշել է «Լրագրողներ առանց սահմանների» կազմակերպության Արևելյան Եվրոպայի և Կենտրոն ական Ասիայի գրասենյակի ղեկավար Ջոհան Բիրը:

Կազմակերպությունը հայտարարության մեջ հիշեցրել է, որ Թուրքիան 2015 թվականի մամուլի ազատության ինդեքսում 180 երկրների շարքում ընդամենը 149-ն է: