Հայաստանը լիովին ներգրավված է ԵԱՀԿ-ի գործունեության մեջ. Անդրեյ Սորոկին

Հայաստանը ԵԱՀԿ-ի 57 գործընկեր պետությունների շարքում շատ կարեւոր է, եւ երկիրը լիովին ներգրավված է կազմակերպության գործունեության մեջ: Տեսակետը ԵԱՀԿ Երեւանյան գրասենյակի ղեկավար Անդրեյ Սորոկինինն է, որը նա հայտնեց Հելսինկյան Եզրափակիչ ակտի ստորագրման 40-ամյակի կապակցությամբ հրավիրված ընդունելության շամանակ: «Արմենպրես»-ի փոխանցմամբ, դեսպանը նշեց, որ Ակտի ստորագրումը շատ կարեւոր դերակատարություն ունեցավ Եվրոպայում խաղաղության եւ անվտանգության հաստատման գործում: «Այս փաստաթուղթը նշանակալի ավանդ ունեցավ Եվրոպայում անվտագության ապահովման ուղղությամբ: Ինչ վերաբերում է Հայաստանի հետ հարաբերությանը, ապա համագործակցության 15 տարին համարում եմ խոստումնալից եւ ձեռքբերումներով լի»,- ընդգծեց Սորոկինը:

ԵԱՀԿ Հակամարտությունների կանխարգելման կենտրոնի տնօրեն Մարսել Պեշկոյն էլ շեշտեց, որ դժվար է պատկերացնել, թե ինչպիսին կլիներ Եվրոպան այսօր, եթե 40 տարի առաջ չստորագրվեր Հելսինկյան Եզրափակիչ ակտը: «Թեպետ 40 տարի առաջ Հելսինկիում եվրոպական պետությունների ղեկավարներն ունեին գաղափարական հակասություններ, սակայն ստորագրեցին փաստաթուղթ, որը հաջորդ տասնամյակների համար շատ կարեւոր դերակատարություն ունեցավ Եվրոպայի կյանքում: Այն ապահովեց հակամարտությունների վերացումը եւ Եվրոպայում անվտանգության միջավայրի ձեւավորման հարցում առանցքային դեր խաղաց»,- շեշտեց Պեշկոյը:

Միջոցառաման ավարտին տեղի ունեցավ Հելսինկյան եզրափակիչ ակտի 40-ամյակին նվիրված հատուկ ծրարի մարումը: Այն յուրահատուկ ֆիլատելիստական արտադրանք է, թեմատիկ ծրար, որին փակցված է 2012թ. թողարկված' ԵԱՀԿ-ին նվիրված նամականիշը, որը մարվելու է հատուկ դրոշմակնիքով: 1000 տպաքանակով պատրաստված հատուկ ծրարի վրա պատկերված է Հելսինկյան Եզրափակիչ ակտի 10-ամյակի խորհրդանշանը: