ՌԴ ԱԳՆ ղեկավարը Սոչիում հանդիպել է Թուրքիայի իր գործընկերոջ հետ

Ռուսաստանի Դաշնության արտաքին գործերի նախարար Սերգեյ Լավրովը Սոչիում հանդիպել է Թուրքիայի իր գործընկեր Ֆերիդուն Սինիրլիօղլուի հետ:

Այս մասին, ինչպես հաղորդում է «Արմենպրես»-ը, հայտնում է «ՌԻԱ Նովոստի» լրատվական գործակալությունը:

Հանդիպման ժամանակ երկու երկրների ԱԳՆ ղեկավարները քննարկել են իրավիճակը Սիրիայում, իրադրությունը Մերձավոր Արեւելքում եւ Հյուսիսային Աֆրիկայում: Կշոշափվի նաեւ փախաստականների հետ կապված իրավիճակը, որը, ինչպես նշում են ՌԴ ԱԳՆ տեղեկատվության եւ հրատարակչության վարչությունում, այժմ խիստ արդիական է:

Բացի այդ, կողմերը քննարկել են բարձր մակարդակի երկկողմանի շփումների ժամանակացույցը:

Հանդիպումից առաջ Լավորվը լրագրողներին հայտարարել է, որ Ռուսաստանը եւ Թուրքիան այս տարի բարձր մակարդակի շփումներ են պատրաստում, եւ որ երկու երկրները ցանկանում են Մերձավոր Արեւելքը տեսնել կայուն եւ ժողովրդավար, չնայած մոտեցումներում տարաձայնությունները մնում են:

Ֆերիդուն Սինիրլիօղլուն Սերգեյ Լավրովի հետ հանդիպման համար Սոչի էր մեկնել Բաքվից, որտեղ նա գտնվում էր երկօրյա պաշտոնական այցով:

Ադրբեջանական ԶԼՄ-ները հայտնել էին, որ Ադրբեջանի ղեկավարության հետ հանդիպումներում, երկկողմ հարաբերությունների հետ կապված հարցերին զուգահեռ, քննարկվել է նաեւ ղարաբաղյան հակամարտության կարգավորման խնդիրը, որի վերաբերյալ Սինիրլիօղլուն մտադիր է մտքեր փոխանակել նաեւ Լավրովի հետ: