Սեյրան Օհանյանն անհեթեթություն է համարում հայկական բանակի վերաբերյալ Վահան Մարտիրոսյանի հայտարարությունը

ՀՀ պաշտպանության նախարար Սեյրան Օհանյանը անհեթեթություն է համարում Ադրբեջանից քաղաքական ապաստան խնդրած Վահան Մարտիրոսյանի հայտարարությունն այն մասին, թե հայկական բանակն ի վիճակի չէ դիմակայել ադրբեջանական բանակին: ՀՊՏՀ-ում լրագրողների հետ զրույցում նախարարն ընդգծեց, որ հայ ժողովուրդը լավ գիտի, թե ինչի է այսօր ընդունակ հայկական բանակը: «Մեր բանակը դինամիկ զարգացող կառույց է: Այն մեկ օրում չէ, որ հասել է այս աստիճանի: Մեր և մեր ժողովրդի համատեղ, քրտնաջան, հետևողական աշխատանքի արդյունքն է, որ մեր բանակն այս աստիճանին հասել է»,- ասաց նախարարը:

Սեյրան Օհանյանը չկարողացավ հստակ պատասխանել հարցին՝ ծառայե՞լ է Վահան Մարտիրոսյանը հայոց բանակում, սակայն կարծիք հայտնեց, որ չի ծառայել՝ ընդգծելով, որ հայկական բանակում ծառայած անձը նման անհեթեթ հայտարարություններ չէր անի: Նախարարը հավելեց, որ պատկան մարմինները կզբաղվեն նրանով: