PKK-ն հրապարակել է խաղաղության համար իր երեք պայմանները

Թուրքիայում ինքնավարության համար պայքար տանող Քուրդիստանի աշխատավորական կուսակցության (PKK) զինված թեւը հրապարակել է երկրում խաղաղության եւ հաշտության համար իր երեք պայմանները, սպառնալով, որ հակառակ դեպքում, քրդերի պայքարը կշարունակվի եւս 30 տարի: Այս մասին, ինչպես հաղորդում է «Արմենպրես»-ը, հայտնում է գերմանական Der Spiegel հանդեսը:

Հյուսիսիրաքյան Կանդիլ լեռան վրա PKK-ի բազաներից մեկում քուրդ առաջնորդ Ալի Հայդար Քայթանի հետ ունեցած զրույցում վերջինս ասել է, որ հուլիսից թուրք-քրդական բախումների վերսկսման մեղավորը Թուրքիայի նախագահ Ռեջեփ Թայիփ Էրդողանն է:

PKK-ի հիմնադիրներից Քայթանը նշել է, որ տարիների ընթացքում կազմակերպությունը փոխել է իր դիրքորոշումը, եւ այժմ ձգտում է Թուրքիայի տարածքում ոչ թե անկախ Քուրդիստան, այլ քրդական ինքնավարություն ստեղծել:

«Մենք միայն ինքնավարություն ենք ցանկանում ստեղծել: Մարտերի վերսկսման միակ մեղավորը Էրդողանն է: PKK-ի հաձակումները միմիայն պատասխան են Թուրքիայի անվտանգության ուժերի հարձակումներին: Էրդողանը պատերազմ է հայտարարել մեզ, եւ մենք մեզ պաշտպանում ենք», -ասել է նա:

Ըստ Քայթանի' քրդերի հետ Թուրքիայի միջեւ խաղաղ բանակցությունները կարող են վերականգնվել, եթե թուրքական բանակը դադարեցնի հարձակումները, բանտից ազատ արձակվի PKK-ի առաջնորդ Աբդուլլահ Օջալանը եւ չեզոք որեւէ երկիր միջնորդություն ստանձնի թուրքական պետության եւ քրդերի միջեւ:

«Օրինակ' որպես միջնորդ կարող է հանդես գալ ԱՄՆ-ը: Այլ տարբերակ չկա: PKK-ի նոր մարտիկներն ավելի արմատական են: Հաշտության համար որպես տարեց սերունդ մենք վերջին հնարավորությունն ենք Անկարայի համար: Հակառակ դեպքում, պայքարը կշարունակվի եւս 30 տարի», - ասել է Քայթանը:

Թուրքիայում քրդերի իրավունքների վերականգնման համար PKK-ն պայքարը սկսել է 1980-ական թվականներից: Մինչ այժմ այդ պայքարում թուրք-քրդական բախումներում զոհվել են 40 հազարից ավելի մարդիկ, իսկ թուրքական տնտեսությունը տասնյակ միլիարդավոր դոլարների վնաս է կրել: