Լասլո Բորբելին Հայաստանը կարևոր գործընկեր է համարում Ռումինիայի համար

Հայաստանը կարևոր գործընկեր է Ռումինիայի համար: ՀՀ Ազգային ժողովում լրագրողների հետ հանդիպմանը Ռումինիայի Պատգամավորների պալատի արտաքին քաղաքականության հանձնաժողովի նախագահ Լասլո Բորբելին նկատեց, որ Ռումինիան եղել է առաջին պետություններից մեկը, որը 24 տարի առաջ ճանաչել է Հայաստանի անկախությունը: «Պատահական չէ, ո ր ես Հայաստան եմ այցելել հենց Հայաստանի անկախության օրը: Հայաստանը մեզ համար շատ կարևոր գործընկեր է, ինչի մասին է վկայում Ռումինիայում հայկական հզոր համայնքի առկայությունը, որը շատ կարևոր դեր է խաղում մեր երկրի հասարակական-քաղաքական կյանքում»,- նշեց ռումինացի պատգամավորը:

Նա ընդգծեց, որ Ռումինիայի խորհրդարանում ազգային փոքրամասնությունների 19 ներկայացուցիչ կա, և նրանց խմբի ղեկավարն է ազգությամբ հայ Վարուժան Փամբուկչյանը: «Պետք է նշեմ նաև պարոն Վարուժան Ոսկանյանի անունը, ով տարբեր պետական պաշտոններ է զբաղեցրել Ռումինիայում: Մենք առաջիկայում երկու երկրների խորհրդարանների միջև համագործակցության հուշագիր կստորագրենք: Մենք Հայաստանի Ազգային ժողովի նախագահին հրավիրել ենք հաջորդ տարի այցելել Ռումինիա»,- ասաց Բորբելին:

Նա նաև հույս հայտնեց, որ առաջիկայում կլինի երկու երկրների արտաքին գործերի նախարարների հանդիպում, որի ընթացքում կքննարկվեն տարբեր բնագավառներում համագործակցությունը խորացնելու հետ կապված հարցեր: