Հայ-բելառուսական քաղաքական երկխոսությունն ամենաբարձր մակարդակի վրա է. դեսպան Նազարուկ

Հայ-բելառուսական քաղաքական երկխոսությունն ամենաբարձր մակարդակի վրա է: «Արմենպրես»-ի հետ զրույցում երկկողմ հարաբերություններին նման գնահատական տվեց ՀՀ-ում Բելառուսի արտակարգ և լիազոր դեսպան Իգոր Նազարուկը: «Բաց հարաբերություններ, հայացքների նմանություն, միջազգային հիմնական խնդիրների նկատմամբ նման մոտեցում. սրանք խթանում են մեր հետագա կառուցողական հարաբերությունների աճը»,- նշեց դեսպանը: Այդուհանդերձ, նա նկատում է, որ տրանսպորտային առումով հեռու լինելը դժվարեցնում է ինտենսիվ հարաբերությունները. «Պետք է աշխատենք, որ հայերն ու բելառուսներն իրարից հեռու չզգան: Մանավանդ այս տարվա հունվարից մենք միևնույն' Եվրասիական տնտեսական միությունում ենք: Մաղթում եմ հայ ընկերներիս ու եղբայրներիս բարգավաճում»:

Դեսպանը կարևորում է Երևանում ԵԱՏՄ երկրների կառավարությունների ղեկավարների մակարդակում նոյեմբերին կայանալիք հանդիպումը: «Ես նոր եմ ստանձնել այս պաշտոնը' երիտասարդ դեսպան եմ, տարիքի մասին չեմ ասում, այլ աշխատանքային փորձի: Մենք աշխատում ենք մի շարք միջոցառումների վրա, հույս ունեմ, որ դրանցից ամենալուրջը կլինի մեր կառավարությունների ղեկավարների նիստը, որը նոյեմբերին կանցկացվի Երևանում: Ինձ համար նույնպես սա կլինի լրացուցիչ քննություն»,- նշեց դեսպանը:

Հայաստանի Հանրապետության և Բելառուսի Հանրապետության միջև դիվանագիտական հարաբերությունները հաստատվել են 1993թ. հունիսի 12-ին: ՀՀ դեսպանությունը Մինսկում բացվել է 1993 թվականին, ԲՀ դեսպանությունը Երևանում' 2001 թվականին: