Ադրբեջանի ֆինանսական հատվածը ծանր վիճակում է

Նավթի համաշխարհային գնանկման պատճառով տնտեսական ճգնաժամում հայտնված Ադրբեջանի ֆինանսական հատվածը հայտնվել է ծանր վիճակում:

Այս մասին, ինչպես հաղորդում է «Արմենպրես»-ը, հայտնում է report.az լրատվական կայքը՝ հղում կատարելով Համաշխարհային տնտեսական ֆորումը կազմակերպող Global Competitiveness Report 2015-2016 զեկույցին:

Զեկույցի՝ Ադրբեջանին վերաբերող բաժնում ասվում է, որ ներկա ծանր պայմաններում երկարատև տնտեսական աճ ապահովելու համար հիմնականում չմշակված ապրանք արտահանող Ադրբեջանը պետք է վերակազմավորի իր տնտեսությունը, դիվերսիֆիկացնի ու շուկայական քաղաքականություն իրականացնի:

Զեկույցի հեղինակներն Ադրբեջանում ստեղծված ծանր ֆինանսական վիճակը պայմանավորել են բիզնեսի հատվածում կոռուպցիայի խնդրահարույց լինելը և ֆինանսական հատվածի զարգացված չլինելը, ինչի հիմնական խնդիրն է հանդիսանում մասնավոր ներդրումների կարիք ունեցող Ադրբեջանի համար:

Թեմայի առնչությամբ ադրբեջանցի տնտեսագետ-փորձագետ Գադիր Իբրահիմլին Ադրբեջանի ֆինանսական հատվածի ծանր դրությունը բացատրել է այդ ոլորտում ձեռնարկությունների' փոխադարձ պարտքերի մեջ լինելու խնդրով:

Նրա խոսքով՝ համատարած կոռուպցիան Ադրբեջանում հանդիսանում է այդ ոլորտի զարգացման գլխավոր խոչընդոտը:

«Երկրի ֆինանսական հատվածի չզարգանալը կապված է հենց կոռուպցիայի գործոնի հետ: Պետական բյուջեի նշանակալից մասը ձևավորող պետական և մասնավոր ընկերությունների միմյանց ունեցած փոխադարձ պարտքերի չափը գրեթե հավասարվել է պետբյուջեի կեսին: Նման վիճակում բանկային համակարգը չի կարող նորմալ զարգանալ: Դա շատ խիստ խնդիր է: Հենց այդ փոխադարձ մեծ պարտքերն են բերում ֆինանսական հատվածի անկմանը»,- ընդգծել է ադրբեջանցի տնտեսագետը:

Ադրբեջանական ԶԼՄ-ների համաձայն՝ ներկայումս ադրբեջանական բանկերին խոշոր պարտքային պարտավորություններ ունեցող միայն ֆիզիկական անձանց թիվը գերազանցում է 2,5 մլն-ը: