Սիրիացի քրդերը Ռուաստանի հետ համագործակցության պատրաստակամություն են հայտնել

Սիրիայի քրդերի Դեմոկրատական միասնություն կուսակցության (PYD) արտաքին կապերի իրավասու Սիհանոք Դիբոն հայտարարել է, որ կարեւոր քայլ են համարում Սիրիայում «Իսլամական պետություն» (ԻՊ) ահաբեկչական խմբավորմանը Ռուսաստանի կողմից թիրախ վերցնելը եւ պատրաստ են աջակցություն են ցուցաբերել այդ գործողություններում:

Ինչպես հաղորդում է «Արմենպրես»-ը` վկայակոչելով Sputnik լրատվական կայքը, քուրդ գործիչն նշել է, որ ԻՊ-ի դեմ պայքարում սիրիացի քրդերը պատրաստ են Ռուսաստանի հետ համագործակցությանը:

«Թող Ռուսաստանը մեզ զենք տա եւ մենք ԻՊ-ին կհարվածենք միասին»,- ասել է Դիբոն' հավելելով, որ մտադիր են մոտ ժամանակում PYD-ի ներկայացուցչություն բացել Ռուսաստանում:

«Ռուսաստանի արտգործնախարարությունը մեզ առաջարկել է PYD-ի գրասենյակ բացել, ինչը մենք մեծ գոհունակությամբ ընդունել ենք: Մոտ ժամանակում մենք ներկայացուցչություն կբացենք Ռուսաստանում»,- հայտնել է նա:

Դիբոն ասել է, որ եթե Ռուսաստանից զենք ստանան, ապա իրենք ԻՊ-ի դեմ կպայքարեն ցամաքում, իսկ Ռուսաստանը' օդից:

«Այդպես մենք կհամագործակցենք իրար հետ' ԻՊ-ի դեմ միասին պայքարելու գործում», - նկատել է նա:

ՌԴ ԱԳՆ ղեկավար Սերգեյ Լավրովը Նյու Յորքում կազմակերպած մամուլի ասուլիսում հայտարարել է, որ ռուսական զենքերը քրդերին հասցնում են Իրաքի կառավարության միջոցով:

«Մենք ռուսական զենքերը քրդերին հասցնում ենք Իրաքի կառավարության միջոցով: Բաղդադի հետախուզական կենտրոնում Ռուսադտանի, Իրաքի, Իրանի եւ Սիրիայի մասնագետների հետ միասին ներկայացված են նաեւ քրդերը», -ասել է Լավրովը: