Սերժ Սարգսյանի ուղերձը «Ռուսաստանի հայերի միություն» համառուսաստանյան հասարակական կազմակերպության 15-ամյա հոբելյանի առթիվ

Սրտանց շնորհավորում եմ «Ռուսաստանի հայերի միության» բազմաթիվ անդամներին՝ կազմակերպության ձևավորման 15-ամյակի կապակցությամբ: ՌՀՄ-ի ստեղծումը նշանակալի քայլ դարձավ Ռուսաստանի հայ համայնքի համախմբման և Ռուսաստանում ապրող հայերի ազգային ինքնության պահպանման ճանապարհին:

ՌՀՄ-ի կայացման գործում որոշիչ դեր խաղաց կազմակերպության հիմնադրի և անփոփոխ ղեկավարի՝ Արա Աբրահամյանի նպատակաուղղված աշխատանքը, ով երկար տարիներ մշտապես բնակվելով Ռուսաստանում, շատ բան է անում մեր եղբայրական պետությունների միջև բազմակողմ կապերի հետագա ամրապնդման համար:

«Ռուսաստանի հայերի միությունը» մեծ աշխատանք է տանում Ռուսաստանում հայերի հոգևոր և մշակութային ավանդույթների վերականգնման ուղղությամբ, զգալի ներդրում է ունենում սոցիալապես կարևոր, կրթական և բարեգործական ծրագրերի իրականացման մեջ: Կազմակերպության ղեկավարության նախաձեռնողականության շնորհիվ է, որ ընդլայնվում են մեր երկրների քաղաքացիների անմիջական շփումները:

Հայկական այլ համայնքային կազմակերպությունների հետ համատեղ ՌՀՄ-ն հետևողականորեն ուշադրություն է դարձնում երիտասարդ սերնդի հայրենասիրական ոգով դաստիարակությանը, նրանց մոտ բարոյական ուղենիշերի ձևավորմանը, իրենց հայրենակիցների հետ կապերի ամրապնդմանը:

Այսօր Ռուսաստանի Դաշնությունում ստեղծված են բոլոր պայմանները հայկական համայնքային և հոգևոր կյանքի զարգացման համար. կառուցվում են նոր մշակութային կենտրոններ, բացվում են Հայ Առաքելական եկեղեցու տաճարներ, բազմազգ Ռուսաստանի մյուս ժողովուրդների ներկայացուցիչների հետ համատեղ լայնորեն նշվում են հայկական ավանդական տոները:

ՌՀՄ-ն նպաստում է Ռուսաստանում մշակութային, կրթական և հասարակական կյանքի բազմակողմանիության պահպանմանը, ազգամիջյան ներդաշնակության զարգացմանը, փոխադարձ հարգանքի, բարիդրացիության և հանդուրժողականության սկզբունքների խթանմանը:

«Ռուսաստանի հայերի միությանը», նրա բոլոր անդամներին մաղթում եմ նորանոր հաջողություններ Հայաստանի և Ռուսաստանի ժողովուրդների դարավոր բարեկամության ամրապնդմանն ուղղված մեր ընդհանուր գործին ծառայելու մեջ: