Esquire հանդեսը բրիտանացի դերասանուհի Էմիլիա Քլարկին համարել է աշխարհի ամենագրավիչ կինը

Բրիտանացի դերասանուհի Էմիլիա Քլարկը, որին հեռուստադիտողները հիշում են «Գահերի խաղը» հեռուստասերիալում Դեյեներիս Թարգարիենի և «Տերմինատոր. Գենեզիս» բլոքբասթերում Սառա Կոննորի դերերով, հայտարարվել է գեղեցիկ սեռի ամենագրավիչ ներկայացուցիչն աշխարհում: Ինչպես տեղեկացնում է «Արմենպրես»-ը, 28-ամյա դերասանուհին գլխավորել է այս տարվա վարկանիշը, որը կազմել է Esquire ազդեցիկ հանդեսը:

Հրատարակությունը նշել է ցուցակի առաջատարի անունը, իսկ ամբողջական ցուցակը հրապարակվելու է հոկտեմբերի 13-ին:

«Էմիլիա Քլարկը պարզապես անմոռանալի է «Գահերի խաղում» և դարձել է աշխարհում ամենագրավիչ կնոջ կոչման «թիվ մեկ» անվերապահ թեկնածուն: Սա է Esquire-ի աշխատակիցների, նրանց ընտանիքների ու ընկերների միահամուռ կարծիքը»,- ասել է հանդեսի նախագծերի ղեկավար Լիզա Հինթերմանը, հաղորդել է ՏԱՍՍ-ը: