Հեռուստահաղորդավարուհի Օփրա Ուինֆրին մեկ օրում 45 մլն դոլար է վաստակել իր գնած բաժնետոմսերի հաշվին

Ամերիկացի հեռուստահաղորդավարուհի և դերասանուհի Օփրա Ուինֆրին մեկ օրում 45 մլն դոլար գումար է վաստակել: Այդ մասին, ինչպես տեղեկացնում է «Արմենպրես»-ը, հաղորդել է հոլիվուդյան TMZ հանդեսը:

«Օփրա Ուինֆրին 10-տոկոսանոց բաժնեմաս է ձեռք բերել դժվարին օրեր ապրող Weight Watchers դիետիկ սննդի և նիհարելու ընկերության կապիտալում,- գրում է հանդեսը:- Երբ նրա ղեկավարությունը հոկտեմբերի 19-ին հայտարարել է այդ մասին, բաժնետոմսերի արժեքը բարձրացել է 105 տոկոսով»: Արդյունքում հեռուստահաղորդավարուհին ակնթարթորեն իր կարողությունն ավելացրել է 45 մլն դոլարով:

Միաժամանակ Weight Watchers ընկերությունը հայտարարել է, որ ընդլայնում է իր գործունեությունն առողջ ապրելակերպի ոլորտում ապրանքների ու ծառայությունների թողարկման հաշվին:

Օփրա Ուինֆրին բաժնետոմսերը ձեռք է բերել յուրաքանչյուրը 6,79 դոլար գնով: Հոկտեմբերի 19-ին սակարկությունների փակվելու պահին դրանց արժեքը հասել է 13,92 դոլարի:

Ինչպես նշում է ՏԱՍՍ-ը, ներկայիս ձեռքբերումն ընդգծում է նաև Օփրա Ուինֆրիի գործարար տաղանդը, որը նրան չի դավաճանում ողջ կյանքի ընթացքում: Այսպես, 2014 թվականի դրությամբ նրա անձնական կարողությունը կազմել է 2,9 մլրդ դոլար: