Հալեպում իրավիճակը վերջին օրերին ավելի հանգիստ է

Հալեպում վերջին օրերին իրավիճակն ավելի հանդարտ է, և միջադեպեր չեն գրանցվել:

Այս մասին «Արմենպրես»-ի հետ զրույցում նշեց Հալեպի մեր աղբյուրը' ավելացնելով, որ էլեկտրական հոսանքը քաղաքում կրկին անջատված է: Կառավարությունն աշխատանքներ է տանում հոսանքը վերականգնելու ուղղությամբ: Մարդիկ ապրում են արդեն սովորական դարձած դժվարին կյանքով: Աղբյուրը նաև տեղեկացրեց, որ երկու օր է ջրամատակարարումը կարճ ժամանակով վերականգնվել է, սակայն ջրի հոսքը հասանելի է շենքերի միայն 2-3-րդ հարկերին, այն էլ էլեկտրածին սարքավորումների օգնությամբ:

Աղբյուրը նաև նշեց, որ ուրբաթ գիշերվա ռմբակոծությունները, որոնց հետևանքով մայր ու որդի էին զոհվել, նաև մեծ նյութական վնասներ էր պատճառել:

«Ոչ ոք չգիտի, թե ինչ է լինելու, անակնկալները մշտապես սպասելի են»,- նշեց աղբյուրը:

Հոկտեմբերի 17-ին զինված ահաբեկչական խմբավորումների կողմից Հալեպի «Քաբրի»-ին կից թաղամասերի հրթիռակոծության հետևանքով զոհվել են 1956թ. ծնված Վերա Կիրակոսյան-Կենտիմյանը և նրա որդին՝ 1985թ. ծնված Հարություն Կենտիմյանը: Վիրավորվել է Դավիթ Տեր-Ներսիսյանը:

Հալեպ քաղաքը 2012թ. ամռանից ի վեր հայտնվել է կառավարական ուժերի և զինված տասնյակ խմբավորումների բախումների թիրախում: Բախումներն այնտեղ մինչև օրս շարունակվում են: Քաղաքի արևմտյան թաղամասերը գտնվում են կառավարական ուժերի, իսկ արևելյան թաղամասերը' զինված խմբավորումների վերահսկողության տակ: