Սլովենիայի խորհրդարանը լիազորություններ է տվել բանակին միգրանտների ներհոսքը վերահսկելու համար

Սլովենիայի խորհրդարանը հավանություն է տվել այն օրինագծին, որը բանակին լրացուցիչ լիազորություններ է տալիս Խորվաթիայի հետ սահմանում միգրանտների ներհոսքը վերահսկելու համար, տեղեկացնում է «Արմենպրես»-ը՝ հղում անելով BBC-ին:

Փաստաթուղթը պաշտոնապես թույլատրում է զինծառայողների ուղարկումը սահմանապահ այն ստորաբաժանումներին օգնելու համար, որոնք պարեկում են 670 կիլոմետր երկարությամբ սահմանը:

Զինծառայողներն այժմ, մասնավորապես, իրավունք ունեն բռնել սահմանային ռեժիմը խախտողներին և նրանց հանձնել ոստիկանությանը, ինչպես նաև կարգադրություններ անել սահմանամերձ գոտում գտնվող քաղաքացիական անձանց:

Ավելի վաղ բանակը կարող էր միայն տեխնիկական և լոգիստիկական աջակցություն ցուցաբերել ոստիկանությանը:

Խորհրդարանը նաև մտադիր է դիմել Եվրամիությանը՝ միգրանտների հետ կապված ճգնաժամի լուծման համար հավելյալ ֆինանսական օգնություն ցուցաբերելու խնդրանքով:

Հոկտեմբերի 18-ին ավելի քան 20 հազար գաղթականներ են ժամանել Սլովենիա, որի բնակչությունը կազմում է ընդամենը 2 մլն մարդ: Հոկտեմբերի 20-ին Սլովենիայի ՆԳ նախարարության ներկայացուցիչ Բոյան Կիտելը BBC-ին ասել է, որ Խորվաթիան խախտել է այն փախստականների թվաքանակի վերաբերյալ նախնական գրավոր համաձայնությունները, որոնք պետք է անցնեն երկու երկրների սահմանով: Ինչպես պնդում է Կիտելը, խորվաթ ոստիկանները գաղթականներին պարզապես բաց են թողնում սահմանով՝ առանց նախազգուշացնելու: