Գերմանիան կփորձի նպաստել ԼՂ հակամարտության կարգավորմանը` ստանձնելով ԵԱՀԿ նախագահությունը

Գերմանիայի արտաքին գործերի դաշնային նախարարության Արեւելյան Եվրոպայի, Հարավային Կովկասի եւ կենտրոնական Ասիայի տարածաշրջանի երկրների հարցերով հատուկ հանձակատար Անդրեաս Պեշկեն Երեւանում եւ Բաքվում մտադիր է քննարկել Լեռնային Ղարաբաղի հակամարտության կարգավորման հարցը եւ հասկանալ, թե որոնք են կոնֆլիկտի լուծման տարբերակները: «Արմենպրես»-ի հարցին ի պատասխան Պեշկեն ասաց, որ հակամարտությունը շատ բարդ է եւ ունի երկար պատմություն:

«Իհարկե որքան էլ այլ երկրներ հետաքրքրված լինեն հակամարտության կարգավորմամբ, առաջնային հետաքրքրություն պետք է ցուցաբերեն Հայաստանն ու Ադրբեջանը: Նրանք պետք է գան համաձայնության: Մենք շատ մտահոգված ենք հակամարտության գոտում լարվածության մեծացման առնչությամբ, ինչը մարդկային կյանքեր է խլում երկու կողմից էլ: Մենք կոչ ենք անում բոլոր կողմերին անել հնարավորը' միմյանց վստահելու եւ լարվածությունից խուսափելու համար»,- ասաց Պեշկեն' հավելելով, որ Գերմանիան ԵԱՀԿ Մինսկի խմբի անդամ է եւ հաջորդ տարի ստանձնելով ԵԱՀԿ նախագահությունը ջանքեր կգործադրի հակամարտության կարգավորման համար: «Դա իհարկե կլինի շատ բարդ, գուցե հարցի կարգավորումը մեկ տարվա ընթացքում չլուծվի, բայց գուցե կարողանանք լուրջ զարգացումներ ունենալ այդ առնչությամբ»,-ասաց Պեշկեն:

Գերմանիայի արտաքին գործերի դաշնային նախարարության Արեւելյան Եվրոպայի, Հարավային Կովկասի եւ կենտրոնական Ասիայի տարածաշրջանի երկրների հարցերով Հատուկ հանձակատար Անդրեաս Պեշկեն Հայաստան է ժամանել տարածաշրջանային այցով: Մինչ Երեւան ժամանելը Պեշկեն եղել է Բաքվում եւ Թբիլիսիում: Երեւանում նա հանդիպումներ է ունենալու ՀՀ Նախագահի աշխատակազմի ղեկավար Վիգեն Սարգսյանի եւ ՀՀ ԱԳ նախարարի տեղակալ Կարեն Նազարյանի հետ: