ԱՊՀ-ի երկրների վարչապետները 40 փաստաթուղթ են ստորագրել Դուշանբեում

ԱՐԽԻՎ 30 Հոկտեմբեր, 2015 22:32

ԱՊՀ-ի մասնակից պետությունների վարչապետները Համագործակցության կառավարությունների ղեկավարների՝ հոկտեմբերի 30-ին Դուշանբեում կայացած նիստի շրջանակներում շուրջ 40 փաստաթուղթ են ստորագրել: Դրանցից մի քանիսը վերաբերում են հակաօդային պաշտպանությանը, ինչպես նաեւ առեւտրատնտեսական համագործակցությանը, հումանիտար կապերին, ֆինանսական եւ սոցիալ-տնտեսական ոլորտին, իրավապահ բնագավառում փոխգործակցությանը: Մասնավորապես, կառավարությունների ղեկավարները որոշում են ընդունել Ազատ առեւտրի գոտու մասին 2011 թվականի հոկտեմբերի 18-ի պայմանագրի դրույթների իրագործման ընթացքի եւ մինչեւ 2020 թվականը ԱՊՀ-ի Տնտեսական զարգացման ռազմավարության երրորդ փուլի իրականացման միջոցառումների ծրագրի մասին:

Ստորագրվել են նաեւ փաստաթղթեր՝ նվիրված արտակարգ իրավիճակների կանխման եւ դրանց հետեւանքների վերացման բնագավառում փոխգործակցությանը, ինչպես նաեւ ԱՊՀ-ի մասնակից պետությունների հակաօդային պաշտպանության միացյալ համակարգի ստեղծման ու զարգացման ֆինանսական ասպեկտներին եւ ԱՊՀ-ի մասնակից պետությունների պաշտպանության նախարարների խորհրդին առընթեր հակաօդային պաշտպանության հարցերի համակարգող կոմիտեի գործունեության ապահովմանը:

Նաեւ նիստի արդյունքում հաստատվել Է ԱՊՀ-ի մասնակից պետություններում միջազգային Էլեկտրակապի ծառայություններ մատուցելիս միջօպերատորական փոխհաշվարկների իրականացման պայմանների վերաբերյալ համաձայնագրի նախագիծը:

Բացի այդ, ընդունվել Է մինչեւ 2020 թվականն ընկած ժամանակաշրջանում համալիր միջոցառումների նախագիծ, որը նպատակամղված Է տրանսպորտային միջոցների համար բնական գազի՝ որպես շարժիչային վառելիքի օգտագործման զարգացմանն ու խթանմանը:

ԱՊՀ-ի մասնակից պետություններն սկսել են նախապատրաստվել նաեւ Համագործակցության առաջիկա 25-ամյակին, որը նշվելու Է 2016 թվականին: Այդ կապակցությամբ որոշում Է ընդունվել այդ տարեթվին նվիրված միջոցառումների ծրագրի մասին: