Հազարավոր ցուցարարներ Ռումինիայի վարչապետի պաշտոնաթողությունն են պահանջել ակումբում տեղի ունեցած ողբերգության պատճառով

Բուխարեստում ավելի քան 20 հազար մարդ է մասնակցել հանրահավաքի՝ պահանջելով Ռումինիայի վարչապետ Վիկտոր Պոնտայի, ՆԳ նախարարության ղեկավար Գաբրիել Օպրյայի և այն օկրուգի ղեկավարի պաշտոնաթողությունը, որտեղ հոկտեմբերի 30-ին Colectiv ակումբում բռնկած հրդեհի պատճառով զոհվել են տասնյակ մարդիկ, հաղորդում է «Արմենպրես»-ը՝ հղում անելով Reuters-ին:

Նոյեմբերի 3-ին կայացած հանրահավաքի մասնակիցները, որոնք ընդհարվել են իրավակարգի ներկայացուցիչների հետ, պահանջել են պատժել հրդեհի մեղավորներին: Նրանք երթով անցել են դեպի կառավարության և ներքին գործերի նախարարության շենքեր՝ տանելով պլակատներ՝ «Արթնացի՛ր և մի բան արա» և «Մենք արդարություն ենք պահանջում» կարգախոսներով:

Բողոքների ֆոնին վարչապետ Պոնտան հայտարարել է Սպառողների իրավունքների պաշտպանության ազգային գործակալության տնօրենի ազատման մասին: Նույն օրը պիկետներ են անցկացվել Բրաշով և Պլոեշտի քաղաքներում: Facebook-ում արդեն հայտնվել են հայտարարություններ մոտ օրերս նոր ակցիաների անցկացման մասին: