Հարավային Սուդանում ինքնաթիռի վթարի զոհերի թվում կարող է Ռուսաստանի քաղաքացի լինել. ՌԴ ԱԳՆ

Նախնական տվյալների համաձայն, նոյեմբերի 4-ին Հարավային Սուդանի տարածքում ինքնաթիռի կործանման արդյունքում զոհվածների թվում է ՌԴ քաղաքացի: Ինչպես հաղորդում է «Արմենպրես»-ը' վկայակոչելով «Ինտերֆաքս» գործակալությունը, այս մասին հայտարարել է Ռուսաստանի Դաշնության Արտաքին գործերի նախարարությունը:

«Նոյեմբերի 4-ին Հարավային Սուդանի օդանավակայաններից մեկում, թռիչքից անմիջապես հետո կործանվել է Ан-12 բեռնատար ինքնաթիռը: Այն պատկանում էր տեղական Allied Services ընկերությանը: Նախնական տվյալների համաձայն, օդանավի կործանման հետևանքով զոհվածների թվում կար նաև Ռուսաստանի մեկ քաղաքացի: Այս պահին Կամպալայում Ռուսաստանի դեսպանատունը ճշտում է այդ տեղեկատվությունը», - ասվում է նախարարության տարածած հաղորդագրության մեջ:

Ավելի վաղ ՀՀ արտաքին գործերի նախարարությունը հայտնել էր, որ ինքնաթիռի անձնակազմի զոհված անդամներից հինգը ՀՀ քաղաքացիներ են:

«Եգիպտոսում ՀՀ դեսպանության նախնական տվյալներով' վթարված բեռնատար ինքնաթիռի անձնակազմի զոհված անդամներից հինգը ՀՀ քաղաքացիներ են: Զոհերի ինքնության վերաբերյալ տեղեկտվութունը կտրամադրվի հավելյալ»,-նշում են ԱԳՆ-ից:

Հայտնի է դարձել նաև, որ օդանավը շահագործվում էր տաջիկական Asia Airways ընկերության կողմից: Ինչպես «Արմենպրես»-ին տեղեկացրին ՀՀ ԿԱ քաղացիական ավիացիայի գլխավոր վարչության մամուլի ծառայությունից, անձնակազմի զոհված անդամները ՀՀ ՔԱԳՎ կողմից օդաչուական անձնակազմի արտոնագրված մասնագետներ չեն: