Արցախի եւ ԵՄ-ի միջեւ հարաբերությունների զարգացումը կնպաստի ԼՂՀ-ում ժողովրդավարական կառույցների ամրապնդմանը

ԼՂՀ արտաքին գործերի նախարար Կարեն Միրզոյանը ԵՄ Հարավային Կովկասի տարածաշրջանի հարցերով ներկայացուցիչ Հերբերտ Զաբլերի հետ հանդիպման ժամանակ ներկայացրել է Լեռնային Ղարաբաղում ընթացող իրավիճակը, բարեփոխումներն ու մայիսին կայացած խորհրդարանական ընտրությունների ընթացքն ու արդյունքները:

«Սա մեր երկրորդ հանդիպումն է դեսպանի հետ: Նման հանդիպումները կարեւոր են ԵՄ եւ Արցախի ներկայացուցիչների միջեւ շփումները շարունակելու առումով: Ներկայացրել եմ որոշ գործընթացներ, որոնք տեղի են ունեցել Արցախում մեր վերջին հանդիպումից հետո: Մասնավորապես, ներկայացրել եմ մայիսին կայացած ընտրությունների արդյունքները, եւ համոզմունք եմ հայտնել, որ համագործակցությունը կարող է դրական ազդեցություն ունենալ Արցախում ժողովրդավարական հաստատությունների, ինստիտուտների ամրապնդման առումով: Մտքեր ենք փոխանակել հակամարտության կարգավորման նե րկա փուլի, առկա զարգացումների վերաբերյալ եւ համակարծիք ենք, որ պետք է վերջ տալ իրավիճակի հետագա սրման լարվածությանը»,- ասաց Միրզոյանը:

«Արմենպրես»-ի հարցին, թե ինչու ԵՄ-ն չի աջակցում Ղարաբաղում ժողովրդավարական գործընթացների զարգացմանը, դեսպանը նախ ասաց, որ կառույցը դեմ չէ, որ Արցախում զարգանա ժողովրդավարությունը, այնուհետեւ հավելեց, որ ներկա դրությամբ հարցը օրակարգում չէ: «Ներկա դրությամբ այդ հարցը մեր օրակարգում չէ: Դա է պատճառը, որ աջակցություն չկա»,-ասաց դեսպանը: