Լեյլա Յունուսին ծեծել են ադրբեջանական բանտում. նրա մարմնին կապտուկներ կան

Ադրբեջանի խաղաղության և ժողովրդավարության ինստիտուտի տնօրեն Լեյլա Յունուսի և նրա ամուսնու, պատմաբան Արիֆ Յունուսի վճռաբեկ բողոքի հետ կապված առաջին դատալսումից հետո նրանց փաստաբան Էլչին Սադըգովը լրագրողներին հայտարարել է, որ Լեյլա Յունուսը ծեծի է ենթարկվել բանտում, նրա մարմնին ծեծի հետ կապված կապտուկներ կան:

Ինչպես հաղորդում է «Արմենպրես»-ը' վկայակոչելով faktxeber.com լրատվական կայքը, փաստաբանն ասել է, որ դատալսման ժամանակ Լեյլա Յունուսը գտնվել է փակ ձայն չհաղորդող ապակե խցում, նրա խոսքը չի լսվել, սակայն, նա ցուցադրել է իր վզին եղած մեծ կապտուկները:

Յունուսների դատապաշտպանները միջնորդություն են ներկայացրել նրանց ձերբակալությունը տնային կալանքով փոխարինելու մասին, սակայն, դատավորը մերժել է: Դատարանի հաջորդ նիստը նշանակվել է նոյեմբերի 12-ին:

Լեյլա Յունուսի մարմնին հայտնված կապտուկների հետ կապված փաստաբանը մտադիր է հետաքննության համար դիմել համապատասխան ատյաններին: Էլչին Սադըխովը նաև հայտնել է, որ իրեն Լեյլա Յունուսի հետ հանդիպելու հնարավորություն չի տրվել:

«Լեյլա և Արիֆ Յունուսները գրկախառնված նստել էին դատապարտյալների աթոռին և ոչինչ չեն խոսել»,- ասել է փաստաբանը:

Վճռաբեկ դատարանը նրանց գործը հոկտեմբերի 20-ին ուղարկել է ծանր հանցագործությունների դատարան' արձանագրությունների իրական ցուցմունքներին չհամապատասխանելու պատճառները պարզելու համար: Այդ առնչությամբ դատապաշտպանների դիմումը դատարանը քննել է, սակայն, փաստաբաններին այդպես էլ եզրակացություն չի տրվել:

Լեյլա Յունուսը և նրա ամուսին Արիֆ Յունուսը մեղադրվում են, իբր, Հայաստանի օգտին լրտեսություն կատարելու մեջ, սակայն, նրանց հետապնդելու իրական պատճառն Ադրբեջանում առկա 98 քաղաքական բանտարկյալների խնդրի ակտուալացումն է և միջազգային կազմակերպություններին արված' Բաքվում 2015 թվականի մայիսին անցկացված Եվրոպական խաղերը բոյկոտելու մասին կոչերը:

Ադրբեջանում բանտարկված իրավապաշտպան Լեյլա Յունուսն օրերս արժանացել է OXI DAY հիմնադրամի հանուն ազատության և ժողովրդավարության անվեհեր պայքարի համար Battle of Crete Award պարգևի: Oxi Day Battle of Crete Award պարգևն ամեն տարի շնորհվում է կանանց' ազատության և ժողովրդավարության ոլորտում պաշտպանության, առաջխաղացման գործում նրանց ցուցադրած արիության համար:

Լեյլա Յունուսը Ֆրանսիայի «Պատվո լեգիոն» շքանշանի ասպետ է: ՄԱԿ-ի մարդու իրավունքների Բարձրագույն հանձնակատար Սերգիո Վիերիա դե Մելոնի (Sergio Vieria de Mello) անվան պարգևի և Թեոդոր Հաքերի գերմանական պարգևի դափնեկիր է:

Տեղական և միջազգային հանրության աջակցությունը սրընթաց կերպով կորցնող ալիևյան վարչակարգն իր իշխանությունը պաշտպանելու միակ ուղին տեսնում է ադրբեջանական հասարակությանը ճնշելու և վախ սերմանելու մեջ: Դրա համար ադրբեջանական իշխանությունները շարունակում են քաղաքացիական հասարակության և մամուլի դեմ բռնաճնշումները:

Amnesty International կազմակերպությունը Լեյլա և Արիֆ Յունուսներին «խղճի բանտարկյալներ» է ճանաչել: