Ադրբեջանցիներն իրականում վախենում են պատերազմից և հայերից. «Կոմերսանտ»-ը մեջբերում է Կրեմլի պաշտոնյային

Ռուսաստանի Դաշնության արտաքին գործերի նախարար Սերգեյ Լավրովի երևանյան այցի ֆոնին ռուսական «Կոմերսանտ» պարբերականը հոդված է հրապարակել Լեռնային Ղարաբաղի հակամարտության կարգավորման ներկա փուլի մասին: Ինչպես հաղորդում է «Արմենպրես»-ը' վկայակոչելով kommersant.ru-ն, թերթը հրապարակման մեջ հղում է կատարում բանակցություններին մոտ կանգնած սեփական աղբյուրներին և նշում, որ թե' Երևանում, թե' Բաքվում ներկայում լուրջ զիջումների մասին չի խոսվում: Թերթի զրուցակիցը Երևանից, այնուամենայնիվ, շեշտում է, որ հակամարտության կարգավորման գործում որևէ լուրջ առաջընթաց ակնկալել առանց բանակցություններում ԼՂՀ ներգրավման դժվար է, սակայն այդ տարբերակը չի ընդունվում Ադրբեջանի կողմից: Միաժամանակ թերթի աղբյուրը Ադրբեջանի ուժային կառույցներից մեկից չի բացառել «լայնամաշտաբ ռազամական գործողությունների վերսկսման հնարավորությունը» և նույնիսկ պնդել, որ կարող են գործի դրվել Նախիջևանում տեղակայված ադրբեջան ական զինվորական ստորաբաժանումները:

Այս պնդմանը, սակայն, հակադարձում է Կովկասի ինստիտուտի փոխտնօրեն Սերգեյ Մինասյանը' շեշտելով, որ Ռուսաստանը պաշտպանական ոլորտում պարտավորություններ ունի Հայաստանի նկատմամբ: «Բաքվի կողմից ակտիվ ռազմական գործողությունների վերսկսմանն ուղղված ցանկացած քայլ կկասեցվի Ռուսաստանի կողմից, որը հետաքրքրված չէ ներկայիս ստատուս-քվոյի փոփոխությամբ»,- կարծիք է հայտնել Սերգեյ Մինասյանը:

«Կոմերսանտ»-ի հետ զրույցում Հարավային Կովկասի հարցերով զբաղվող Կրեմլի պաշտոնյան նշում է, որ ադրբեջանական քաղաքական գործիչների հայտարարություններում պետք է հաշվի առնել նաև «PR-ի բաղկացուցիչը»: «Իրականում նրանք վախենում են պատերազմից և վախենում են հայերից: 1990-ականների սկզբին հակամարտությունում պարտությունը նրանց համար բավականին ցավագին էր»,- նշում է Կրեմլի պաշտոնյան: Ըստ նրա' Բաքվի մարտավարությունը ուժեղ հռետորաբանության միջոցով բանակցային դիրքերի բարելավումն է: «Ադրբեջանի ևս մեկ նպատակն էլ այն է, որպեսզի Ղարաբա ղում սառեցված հակամարտությունը մեզ համար սովորական չդառնա: Այդ նպատակով էլ պետք է հակամարտությունը ժամանակ առ ժամանակ ապասառեցնել, ինչի համար էլ շփման գծում բախումները չեն դադարում: Դրանով աշխարհին ազդակ է ուղարկվում, որ պատերազմը դեռևս շարունակվում է, թեկուզև փոքր ինտենսիվությամբ: Դրա մասին պետք չէ մոռանալ և պետք է լուծում փնտրել»,- ասում է թերթի կրեմլյան զրուցակիցը: