Ադրբեջանում աշխատավարձեր չվճարելը զանգվածային է դարձել

Ադրբեջանում պետական և մասնավոր հատվածներում աշխատավարձերի չվճարման դեպքերը զանգվածային բնույթ են ստացել, ինչը կապված է նավթի համաշխարհային գների նվազման պատճառով Ադրբեջանի պետբյուջեում առաջացած մեծ պակասորդի հետ:

Ինչպես հաղորդում է «Արմենպրես»-ը' վկայակոչելով ANS հեռուստաալիքը, աշխատավարձերն ուշացվելու հետ կապված' Բաքվում Բինագադիի շրջանի գործադիր իշխանության շենքի դիմաց հերթական բողոքի ակցիան են անցկացրել շենքերի սինթետիկ սալիկներով երեսպատման աշխատանքներ իրականացնող մի խումբ բանվորներ:

Ակցիայի մասնակիցները բողոքում են, որ չնայած բոլոր աշխատանքներն իրենք վաղուց ավարտել են, սակայն, արդեն վեց ամիս է չեն կարողանում ստանալ հասանելիք աշխատավարձը:

«Մեզ սնում են խոստումներով' արդեն վեց ամիս ուշացնելով մեր աշխատավարձը: Մեր աշխղեկն ասում է, թե աշխատանքների պատվիրատուն Բինագադիի շրջանի գործադիր իշխանությունն է, որը հետո հրաժարվել է վճարել», -հեռուստաալիքին պատմել է բանվոր Էլչին Մահմուդովը:

Աշխատավարձերն ուշացվելու հետ կապված օրեր առաջ Բաքվում զանգվածային բողոքի ակցիա են անցկացրել «Ազերյոլսերվիս», «Ազերսու» պետական ընկերությունների աշխատակիցները: Աշխատավարձերի ուշացման բազմաթիվ դեպքեր են տեղի ունենում Ադրբեջանի կրթության նախարարության համակարգի հաստատություններում, հատկապես, շրջանների դպրոցներում:

Նավթի համաշխարհային գների և մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. փակվել են նավթարդյունաբերության մի շարք ձեռնարկություններ, պետական և մասնավոր հաստատություններ, հազարավոր աշխատավորներ գործազուրկ են դարձել, Ադրբեջանի տնտեսական աճն օրեցօր նվազում է, միջազգային վարկանիշային գործակալությունների տվյալներով' Ադրբեջանական բանկերը կանգնած են ռիսկի սահմանին, այս տարվա ընթացքում Ադրբեջանն արդեն 6,7 մլրդ դոլար է կորցրել, երկրի բյուջեն դեֆիցիտային է դարձել. եկող տարվա բյուջեն անցյալ տարվա պետ բյուջեից մոտ 2 անգամ փոքր է սահմանվել:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձևավորվում է էներգակիրների արտահանումից ստացվող եկամուտների հաշվին:

Ադրբեջանի 1915 թվականի պետբյուջեում նավթի գինը մեկ բարելի համար նախատեսված է 90 դոլար: Ներկայում այն արդեն պետբյուջեում նախատեսվածից մոտ 42 դոլարով ցածր է: