Գիտնականները բացահայտել են Երկրի վրա ջրի առաջացման գաղտնիքը

Արկտիկայում Կանադային պատկանող կղզուց Երկրի հնագույն ապարները գիտնականներին պատմել են, որ մեր մոլորակի ջուրը դրա մակերևույթին գոյություն է ունեցել ի սկզբանե, այլ ոչ թե բերվել է գիսաստղերի կամ աստղակերպերի կողմից: Այդ մասին, ինչպես տեղեկացնում է «Արմենպրես»-ը, ասված է Science հանդեսում հրապարակված հոդվածում:

«Մենք հայտնաբերեցինք, որ այդ ապարների նմուշներում ջրի մոլեկուլներն իրենց մեջ քիչ են պարունակել դեյտերիումի՝ ծանր ջրածնի ատոմներ: Դա վկայում է այն մասին, որ այն Երկրի վրա է ընկել ոչ թե այն բանից հետո, երբ վերջինս կազմավորվել է ու սառել, այլ այն փոշու հետ մեկտեղ, ինչից կերտված է մեր մոլորակը: Այդ փոշու մեջ եղած ջրի մեծ մասը գոլորշիացել է, բայց դրա մնացորդները բավական են եղել Երկրի օվկիանոսների կազմավորման համար»,- հայտարարել է Լիդիա Հալիսը Գլազգոյի (Շոտլանդիա) համալսարանից:

Այսօր մոլորակագետները կարծում են, որ Երկրի ջրերը «տիեզերական» ծագում ունեն: Դրանց աղբյուրը, նրանց կեսի կարծիքով՝ գիսաստղերն են, մինչդեռ մյուս աստղագետները կարծում են, որ մեր մոլորակի ջրային պաշարները այստեղ են «բերվել» աստղակերպերի կողմից, հաղորդել է ՌԻԱ Նովոստի գործակալությունը: