Միջազգային ահաբեկչության դեմ պայքարին պետք է ուղղվեն բոլորիս ջանքերը. Վիգեն Սարգսյան

Հայաստանի Հանրապետությունը ՀԱՊԿ-ին անդամակցության և ՆԱՏՕ-ի հետ համագործակցության շրջանակներում հանձնառու է պայքարել միջազգային ահաբեկչության դեմ: «Արմենպրես»-ի հաղորդմամբ' Ֆրանսիայի հրապարակում Փարիզում նոյեմբերի 13-ին տեղի ունեցած ահաբեկչությունների հետևանքով զոհվածների հիշատակին անցկացվող մոմավառությանը հայտնեց ՀՀ նախագահի աշխատակազմի ղեկավար Վիգեն Սարգսյանը:

«Ես կարծում եմ, որ առաջիկա օրերին միջազգային հանրությունը կանդրադառնա նրան, թե ինչ նոր եղանակներ և միջոցներ պետք է ընդունի ահաբեկչության դեմ պայքարը: Ակնհայտ է, որ այսօր միջազգային անվտանգության ամենամեծ մարտահրավերներից մեկը հենց ահաբեկչությունն է, ուստի և դրա դեմ պայքարին պետք է ուղղվեն բոլորիս ջանքերը:

Հայաստանի Հանրապետությունը ՀԱՊԿ անդամակցության շրջանակներում և ՆԱՏՕ-ի հետ համագործակցության շրջանակներում արել է հնարավորը' իր լուման բերելու միջազգային անվտանգության ամրապնդմանը, և ակնհայտ է, որ այսօր այդ անվտանգության ամենամեծ մարտահրավերներից մեկը հենց ահաբեկչությունն է, ուստի դրան պետք է ուղղվեն մեր ջանքները»,- «Արմենպրես»-ի հաղորդմամբ' նկատեց նա:

Նա նշեց, որ Հայաստանում բոլորը ցնցված և վրդովված են Փարիզում կատարված հանդուգն հանցագործություններից: «ՀՀ Նախագահը բազմիցս հայտարարել է, որ ահաբեկչությունը և նման հանցագործությունները չունեն սահմաններ և չեն ճանաչում ազգություն: Երևանի Ֆրանսիայի հրապարակում այսօր հավաքված բազմաթիվ հայաստանցիներ, երևանցիներ, ինչպես նաև ֆրանսիացի զբոսաշրջիկներ եկել են այստեղ' այդ սարսափելի հանցագործություններից զոհված մարդկանց հիշատակին հարգանքի տուրք մատուցելու և նաև ասելու, որ վախեցած չեն, ու միավորելու են իրենց ուժերն այդ սարսափելի հանցագործության դեմ պայքարում»,- շեշտեց Վիգեն Սարգսյանը: