Պուտինը խոստացել է հայտնաբերել ու պատժել A321-ի դեմ կատարված ահաբեկչական գործողության մեղավորներին

ԱՐԽԻՎ 17 Նոյեմբեր, 2015 13:34

ՌԴ-ի նախագահ Վլադիմիր Պուտինը հայտարարել է, որ Եգիպտոսում ռուսական 321 ինքնաթիռի դեմ կատարված ահաբեկչական գործողության մեղավորները կհայտնաբերվեն ու կպատժվեն, տեղեկացնում է «Արմենպրես»-ը՝ հղում անելով ՏԱՍՍ-ին:

«Ռուսաստանն առաջին անգամը չէ, որ բախվում է բարբարոսական ահաբեկչական հանցագործությունների, հաճախ առանց ներքին կամ արտաքին որևէ տեսանելի պատճառի, ինչպես դա եղավ 2013 թվականի վերջին Վոլգոգրադի կայարանում իրականացված պայթյունի դեպքում: Մենք ոչ մեկի ու ոչինչ չենք մոռացել»,- ասել է պետության ղեկավարը նոյեմբերի 16-ի ուշ երեկոյան կայացած խորհրդակցությունում:

«Սինայում մեր մարդկանց սպանությունը առավել արյունալիներից մեկն է հանցագործության զոհերի թվով: Եվ մենք չենք սրբելու մեր սրտի ու հոգու արցունքները: Դրանք մեզ հետ կմնան ընդմիշտ: Բայց դա մեզ չի խանգարի գտնել ու պատժել հանցագործներին»,-ընդգծել է Պուտինը:

Բոլոր նրանք, ովքեր կփորձեն օժանդակություն ցուցաբերել ահաբեկիչներին, պետք է իմանան, որ դրա հետևանքների համար պատասխան են տալու, ընդգծել է ՌԴ նախագահը:

Պուտինը հանձնարարկել է ՌԴ-ի հատուկ ծառայություններին՝ ուշադրությունը կենտրոնացնել Եգիպտոսում A321-ի դեմ կատարված ահաբեկչական գործողության մեղսակիցներին հայտնաբերելու վրա: Ռուսաստանը կդիմի օտարերկրյա գործընկերներին ու կխնդրի օգնել Եգիպտոսում A321-ի կործմանման մեղավորներին գտնելու հարցում, հայտարարել է Ռուսաստանի նախագահը:

Ինչպես ավելի վաղ հաղորդվել է, ՌԴ Անվտանգության դաշնային ծառայության տնօրեն Ալեքսանդր Բորտնիկովը Պուտինին զեկուցել է, որ A321 ինքնաթիռի կործանման պատճառը ահաբեկչական գործողությունն է եղել: Նա նշել է, որ կործանված ինքնաթիռի բեկորների վրա հայտնաբերվել են օտարերկրյա արտադրության պայթուցիկ նյութեր: A321-ը կործանվել է ինքնաշեն սարքի պայթյունից, որի հզորությունը համարժեք է եղել 1 կիլոգրամ տրոտիլի, հավելել է Բորտնիկովը: