Դեմիրթաշը չի մասնակցի մեջլիսում պատգամավորների երդմնակալության արարողությանը

Թուրքիայի քրդամետ Ժողովուրդների դեմոկրատական կուսակցության ղեկավար Սելահաթթին Դեմիրթաշը չի մասնակցի մեջլիսում նոյեմբերի 17-ին նախատեսված երդմնակալության արարողությանը: Ինչպես հաղորդում է «Արմենպրես»-ը, այս մասին տեղեկացնում է թուրքական «Թարաֆ» պարբերականը:

Դեմիրթաշը չի կարողանա ներկա լինել երդմնակալության արարողությանը վիրահատության ենթարկվելու պատճառով: Սակայն հաղորդվում է, որ նա պատգամավորական երդում կտա ավելի ուշ:

Թուրքիայի Ազգային մեծ ժողովի (ԹԱՄԺ) 26-րդ գումարման նստաշրջանի նորընտիր պատգամավորների երդմնակալության արարողությունը տեղի կունենա նոյեմբերի 17-ին: Նույն օրը կավարտվի ժամանակավոր կառավարության գործունեության ժամկետը: Երկրի նախագահ Ռեջեփ Թայիփ Էրդողանը վարչապետ Ահմեդ Դավութօղլուին կհանձնարարի կազմել նոր կառավարություն, որը գործի կանցնի արդեն նոյեմբերի 18-ից:

Թուրքիայի մեջլիսի պատգամավորները նոյեմբերի 22-ին կընտրեն ԹԱՄԺ նախագահին: Քանի որ իշխող «Արդարություն և զարգացում» կուսակցությունն ընտրությունների արդյունքներով ստացել է 317 պատգամավորական մանդատ, իսկ մեջլիսի նախագահի ընտրության 1-ին և 2-րդ փուլերում անհրաժեշտ է ստանալ պատգամավորներից 367-ի ձայնը, ԱԶԿ-ն կկարողանա իր թեկնածուին անցկացնել երրորդ փուլով, որտեղ պահանջվում է 276 պատգամավորի ձայն:

Նոյեմբերի 1-ին կայացած արտահերթ խորհրդարանական ընտրությունների արդյունքներով Թուրքիայի վարչապետ Ահմեդ Դավութօղլուի գլխավորած «Արդարություն և զարգացում» կուսակցությունն (ԱԶԿ) ստացել է 317 պատգամավորական մանդատ, ընդդիմադիր քեմալական Հանրապետական ժողովրդական կուսակցությունը (ՀԺԿ)՝ 134, քրդամետ Ժողովուրդների դեմոկրատական կուսակցությունը (ԺԴԿ)՝ 59 և «Ազգայնական շարժում» կուսակցությունը (ԱՇԿ)՝ 40 պատգամավոր: