Պետդեպի աշխատակիցը լավատեսական է տրամադրված հայ-ամերիկյան տնտեսական հարաբերությունների խորացման և ընդլայնման գործընթացի նկատմամբ

ԱՄՆ-ի պետքարտուղարի եվրոպական և եվրասիական հարցերով փոխտեղակալ Բրիջիթ Բրինքը լավատեսական է տրամադրված հայ-ամերիկյան տնտեսական հարաբերությունների խորացման և ընդլայնման գործընթացի նկատմամբ: «Արմենպրես»-ի հաղորդմամբ' լրագրողների հետ հանդիպմանն ամերիկացի պաշտոնյան նշեց, որ Հայաստան կատարած այցի հիմնական նպատակն է մասնակցել տնտեսական հարցերով հայ-ամերիկյան կառավարական աշխատանքային խմբի նիստին, քննարկել տնտեսական երկկողմ հարաբերությունների և ներդրումների ընդլայնման հնարավորությունները:

«Հայաստանի Հանրապետությունում ԱՄՆ ընդհանուր նպատակներն են աջակցել ժողովրդավարական հաստատություններին, օգնել Հայաստանին ինտեգրվել տարածաշրջանային տնտեսությանը, բարելավել հարաբերությունները հարևանների հետ, դիմակայել արտաքին ճնշումներին, ինչպես նաև կառուցողական կապեր հաստատել Եվրոատլանտյան հաստատությունների հետ: Այսօր մենք բովանդակային քննարկումներ ենք ունեցել ՀՀ արտաքին գործերի նախարար Էդվարդ Նալբանդյանի, քաղաքական ընդդիմության, ինչպես նաև' քաղաքացիական հասարակության ներկայացուցիչների հետ: Իսկ ավելի ուշ կհանդիպենք ՀՀ Նախագահի հետ: Կարծում եմ աշխատանքային խմբի նիստերն օգնել են, որ տնտեսական աջակցության մասին երկխոսություն ծավալվի առևտրի և ներդրումների խորացման ուղղությամբ»,- ասաց Բրիջիթ Բրինքը:

Նա հույս հատնեց, որ Տնտեսական համագործակցության հարցերով հայ ամերիկյան միջկառավարական աշխատանքային խմբի և Առևտրի ու ներդրումների հայ ամերիկյան խորհրդի՝ այս շաբաթվա երևանյան հանդիպումների միջոցով հնարավոր կլինի վերհանել ամերիկացի ներդրողների վստահությունը Հայաստանի նկատմամբ առավել մեծացնելու ուղիներ: Իսկ բարձր մակարդակի հանդիպումների շարքը երկրներին կօգնի ձևավորել առավել շահեկան առևտրային գործընկերություն: