Նուսայբինում թուրքական ոստիկանությունը կրակում է խաղաղ քաղաքացիների վրա

Թուրքիայի հարավային Նուսայբին քաղաքում արդեն 10-րդ օրն է, ինչ շարունակվում է փողոց դուրս գալու արգելքը: Ինչպես հաղորդում է «Արմենպրես»-ը՝ վկայակոչելով թուրքական Demokrathaber.net-ը, մեծամասամբ քուրդ բնակչություն ունեցող քաղաքում ոստիկանությունը շարունակում է կրակել խաղաղ քաղաքացիների վրա:

Նոյեմբերի 22-ի երեկոյան ոստիկանության արձակած կրակոցներից սեփական տան դիմաց վիրավորվել է 5 երեխայի մայր Մյուզեյեն Քըզըլը: Որովայնի և ազդրի շրջաններում ստացած վնասվածքներով Քըզըլը երկար ժամանակ մնացել է տան առջևի այգում՝ սպասելով շտապօգնությանը: Այդ ամենի հետևանքով կինը զգալի արյուն է կորցրել, և նշվում է, որ նրա կյանքին վնաս է սպառնում:

Ի նշան բողոքի Նուսայբինում հայտարարված փողոց դուրս գալու արգելքի՝ քրդամետ Ժողովուրդների դեմոկրատական կուսակցության՝ Մարդինից ընտրված պատգամավորներ Միթհաթ Սանջարը, Գյուլսուն Յըլդըրըմը, Ալի Աթալան և Էրոլ Դոլանը նոյեմբերի 20-ից հացադուլ են հայտարարել քաղաքի մուտքի մոտ: Այդ տարածքում բողոքի երթ իրականացնել ցանկացող ամբոխի վրա նոյեմբերի 22-ին ոստիկանությունն արցունքաբեր գազ և ջրցան մեքենաներ է կիրառել: Արցունքաբեր գազից և ջրցան մեքենայից տուժել է պատգամավոր Սանջարը, ով տեղափոխվել է հիվանդանոց: