Բուխարեստի Colectiv ակումբում հրդեհի զոհերի թիվը հասել է 60-ի

Բուխարեստի Colectiv գիշերային ակումբում հրդեհի զոհերի թիվն հասել է 60-ի, տեղեկացնում է «Արմենպրես»-ը՝ հղում անելով Ռումինիայի զանգվածային լրատվամիջոցներին:

Նախնական տվյալներով՝ հոկտեմբերի լույս 31-ի գիշերը Colectiv գիշերային ակումբում տեղի ունեցած հրդեհի պատճառ է դարձել հրավառությունը: Ողբերգության պահին ակումբում եղել է մինչև 400 մարդ: Ողբերգության առաջին ժամերին զոհվել է 27 հոգի, ևս 200 տուժածներ հոսպիտալացվել են:

Digi24 հեռուստաալիքի տվյալներով՝ ողբերգության հերթական զոհն է դարձել 19-ամյա մի երիտասարդ, որը նոյեմբերի 22-ին մահացել է Ավստրիայի կլինիկայում: Ավելի վաղ նոյեմբերի 20-ին Գերմանիայի կլինիկաներից մեկում մահացել էր 28-ամյա աղջիկ, իսկ նոյեմբերի 21-ին Բուխարեստում մահացել էր 22-ամյա երիտասարդ:

Ռումինիայի ԶԼՄ-ները հայտնել են, որ ներկայումս Բուխարեստի կլինիկաներում մնում են 40 տուժածներ, որոնցից 10-ի վիճակը բժիշկները գնահատում են՝ ծանր և օրհասական: Արտասահմանյան կլինիկաներում մնում է 28 հոգի, հաղորդել է ՌԻԱ Նովոստին: