Ալիևց պետք է ոչ թե գթասրտություն խնդրել, այլ պահանջել ազատ արձակել քաղբանտարկյալներին

Ադրբեջանի նախագահ Իլհամ Ալիևից պետք է ոչ թե գթասրտություն խնդրել քաղբանտարկյալների համար, այլ պահանջել նրանց ազատ արձակել բանտերից առանց որևէ նախապայմանի և անմիջապես:

Այս մասին, ինչպես հաղորդում է «Արմենպրես»-ը, մեկնաբանելով Ադրբեջանում բռնաճնշումների իրավիճակը, հայտնում է ամերիկյան հեղինակավոր The Washington Post թերթն իր «Ադրբեջանում շարունակվում են բռնությունները մարդու իրավունքների ակտիվիստների դեմ» հոդվածում:

Թերթը հիշատակել է իրավապաշտպաններ Լեյլա և Արիֆ Յունուսների և Ադրբեջանում ձերբակալված բազմաթիվ հասարակական ակտիվիստների, քաղաքական գործիչների, լրագրողների և բլոգերների նկատմամբ կալանավայրերում խոշտանգումների մասին:

«Այս ձերբակալությունները Ալիևի և նրա շրջապատի կողմից իրենց քննադատների դեմ աններելի վերաբերմունքի ցուցանիշ են», -նշել է թերթը:

Հղում կատարելով Amnesty International միջազգային իրավապաշտպան կազմակերպությանը' թերթը նշել է, որ Ադրբեջանում մինչև 100 քաղաքական բանտարկյալ և նվազագույնը 20 խղճի բանտարկյալ կան:

«Երկար ժամանակ Ալիևն արհամարհում է մարդու իրավունքների ոտնահարումներին վերջ դնելու մասին արտասահմանի պահանջները: Այս ընթացքում նրա զինակիցները նոյեմբերի 1-ին անցկացված անազատ և անարդար ընտրությունների միջոցով «վերևների» որոշումները «կնքելու» ֆունկցիան կատարելու համար տեղեր շահեցին խորհրդարանում: Եվրոպայի Խորհրդի խորհրդարանական վեհաժողովի դիտորդական առաքելության երեք անդամ այդ ընտրությունների հետ կապված հայտարարեցին, որ Ադրբեջանում քաղաքական ազատությունների նկատմամբ առկա վերաբերմունքը, այդ թվում արտահայտվելու և մամուլի ազատության, ազատ հավաքվելու և միավորվելու ազատությունների վիճակը թույլ չի տալիս ազատ և ժողովրդավարական ընտրություններ անցկացնել այդ երկրում: Քաղբանտարկյալներին ազատ արձակելու համար ոչ ոք չպետք է Ալիևից գթասրտություն խնդրի: Պետք է նրանից պահանջվի անմիջապես ազատ արձակել բոլոր քաղբանտարկյալներին»,- գրել է թերթը: