Դիարբեքիրի նահանգապետարանը հերքել է Դեմիրթաշի դեմ մահափորձի վարկածը

Դիարբեքիրի նահանգապետարանը հայտարարություն է արել քրդամետ Ժողովուրդների դեմոկրատական կուսակցության ղեկավար Սելահաթթին Դեմիրթաշի դեմ իրականացված մահափորձի վերաբերյալ:

Ինչպես հաղորդում է «Արմենպրես»-ը՝ վկայակոչելով թուրքական «Հաբերլեր» լրատվականը, նահանգապետարանը հայտնել է, որ իրականում Դեմիրթաշի ծառայողական մեքենայի հետևի ապակու վրա հայտնված հետքը փամփուշտի թողած հետք չէ:

Ավելի վաղ թուրքական լրատվականները սկսեցին գրել այն մասին, որ Դեմիրթաշի դեմ մահափորձ է իրականացվել: Ենթադրվում էր, որ անհայտ անձը Դիարբեքիրում կրակել է Դեմիրթաշի ծառայողական մեքենայի վրա այն ժամանակ, երբ վերջինս մեքենայի մեջ է եղել: Դեմիրթաշը հայտնել է, որ կրակոցի ձայն չեն լսել, սակայն նրա թիկնազորը մեքենայից իջնելիս տեսել է զրահապատ ապակու վրա փամփուշտի հետքը: Դեմիրթաշի մեքենան ուսումնասիրության նպատակով տարվել է անվտանգության վաչության քննչական լաբորատորիա: Ոստիկանությունը դեպքի առնչությամբ հայտարարել էր, որ սովարական քարն այդպիսի հետք չի կարող թողնել: Դեպքից հետո քրդամետ կուսակցության առաջնորդը քրդերեն գրառում է կատարել «Թվիթեր»-ի իր միկրոբլոգում՝ նշելով. «Մահն Աստծո հրամանն է»: