Ռուսաստանում Թուրքիայի ռազմական կցորդն անհապաղ կանչվել է ՌԴ ՊՆ

Ռուսաստանը Թուրքիայի ռազմական կցորդին պաշտոնական բողոք է հայտնել թուրքական օդուժի կողմից ռուսական Սու-24 ինքնաթիռի կործանման առնչությամբ: Ինչպես հաղորդում է «Արմենպրես»-ը' վկայակոչելով ռուսական ՏԱՍՍ գործակալությունը, այս մասին հայտարարություն է տարածել Ռուսաստանի պաշտպանության նախարարությունը:

«Ռուսաստանում Թուրքիայի Հանրապետության դեսպանատան ռազմական կցորդն անհապաղ կանչվել է ՌԴ պաշտպանության նախարարություն, որտեղ պաշտոնապես նրան հայտնել ենք մեր պաշտոնական բողոքը Թուրքիայի օդուժի գործողությունների առնչությամբ»,- հայտնել են ՌԴ ՊՆ-ից' հավելելով, որ Սիրիայի տարածքում ռազմական գործողություններն ընդդեմ ահաբեկիչների շարունակվելու են:

Նոյեմբերի 24-ին ռուսաստանյան Սու-24 ինքնաթիռը Սիրիայի տարածքում թուրքական սահմանից 1 կմ հեռավորության վրա կործանվել է Թուրքիայի օդուժի կողմից արձակված հրթիռով եւ վայր ընկել Թուրքիայի սահմանից 4 կմ հեռավորության վրա:

Ռուսաստանի Դաշնության նախագահ Վլադիմիր Պուտինը կատարվածն անվանել է «հարված թիկունքից», որը հասցվել է Ռուսաստանին «ահաբեկիչների հանցակիցների կողմից»: «Այդ իրադարձությունը դուրս է ահաբեկչության հետ սովորական պայքարի շրջանակից: Այսօրվա կորուստը կապված է հարվածի հետ, որը մեր մեջքին հասցրեցին ահաբեկիչների հանցակիցները: Այն ինչ այսօր տեղի է ունեցել, ես չեմ կարող այլ կերպ անվանել»,-ասել է Պուտինը Հորդանանի թագավոր Աբդալլահ երկրորդի հետ հանդիպման ժամանակ:

ՌԴ Դաշնային Խորհրդում առաջարկում են ժամանակավորապես կասեցնել Թուրքիայի հետ բոլոր կապերըՌԴ Դաշնային Խորհրդում առաջարկում են ժամանակավորապես կասեցնել Թուրքիայի հետ բոլոր կապերը: