ՆԱՏՕ-ն հայտարարել է, որ սատարում է իր դաշնակից Թուրքիային

ՆԱՏՕ-ն սատարում է իր դաշնակից Թուրքիային։ Սիրիայում ռուսական օդանավի կործանման կապակցությամբ Հյուսիսատլանտյան դաշինքի արտահերթ նիստից հետո նման հայտարարությամբ է հանդես եկել ՆԱՏՕ-ի գլխավոր քարտուղար Ջենս Սթոլթենբերգը՝ կոչ անելով պաշտոնական Անկարային և Մոսկվային մեղմել լարվածությունը։ «Դիվանգիտությունը և լարվածության թոթափումը կարևոր են իրավիճակի կարգավորման համար»,- «Արմենպրես»-ի փոխանցմամբ՝ ասել է նա։

ՆԱՏՕ-ի գլխավոր քարտուղարը տեղեկացրել է, որ միջադեպի վերաբերյալ զրուցել է Թուրքիայի վարչապետ Ահմեդ Դավութօղլուի հետ, իսկ Թուրքիայի դեսպանը Հյուսիսատլանտյան դաշինքին տեղեկացրել է վերջին զարգացումների մասին։ «Թուրքիան տեղեկացրել է դաշնակիցներին Թուրքիայի օդային սահմանը խախտած ռուսական ռազմական ինքնաթիռի անկման մասին։ Նախկինում ես հայտնել էի իմ մտահոգությունները ՆԱՏՕ-ի սահմանների մերձակայքում Ռուսաստանի Դաշնության կողմից ռազմական գործողությունների իրականացման վերաբերյալ։ Սա ընդգծում է ձեռք բերված պայմանավորվածությունները հարգելու կարևորությունը՝ ապագայում նման միջադեպերից խուսափելու համար»,- ասել է Սթոլթենբերգը՝ հավելելով, որ իրենք շարունակելու են ուշադիր հետևել ՆԱՏՕ-ի հարավարևելյան սահմանին տիրող զարգացումներին։