Դավութօղլուն հեռախոսազրույց է ունեցել Անգելա Մերկելի հետ

Թուրքիայի վարչապետ Ահմեդ Դավութօղլուն զանգահարել է Գերմանիայի կանցլեր Անգելա Մերկելին՝ քննարկելու թուրքական օդուժի կողմից ռուսական Սու-24 ինքնաթիռի կործանումից հետո ստեղծված իրադրությունն ու սպասվելիք զարգացումները:

Ինչպես հաղորդում է «Արմենպրես»-ը, այս մասին տեղեկացնում է թուրքական «Անադոլու» գործակալությունը:

Անգելա Մերկելը շնորհակալություն է հայտնել Դավութօղլուին տեղեկություններ տրամադրելու համար՝ նշելով, որ խնդիրը կքննարկեն նոյեմբերի 29-ին Բրյուսելում կայանալիք Թուրքիա-ԵՄ գագաթնաժողովի շրջանակում:

Ավելի վաղ Դավութօղլուն այս թեմայով հեռախոսազրույց էր ունեցել նաև Միացյալ Թագավորության վարչապետ Դևիդ Քեմերոնի հետ:

Նոյեմբերի 24-ին ռուսաստանյան Սու-24 ինքնաթիռը Սիրիայի տարածքում թուրքական սահմանից 1 կմ հեռավորության վրա կործանվել է Թուրքիայի օդուժի կողմից արձակված հրթիռով եւ վայր ընկել Թուրքիայի սահմանից 4 կմ հեռավորությամբ:

Ռուսաստանի Դաշնության նախագահ Վլադիմիր Պուտինը կատարվածն անվանել է «հարված թիկունքից», որը հասցվել է Ռուսաստանին «ահաբեկիչների հանցակիցների կողմից»: «Այդ իրադարձությունը դուրս է ահաբեկչության հետ սովորական պայքարի շրջանակից: Այսօրվա կորուստը կապված է հարվածի հետ, որը մեր մեջքին հասցրեցին ահաբեկիչների հանցակիցները: Այն, ինչ այսօր տեղի է ունեցել, ես չեմ կարող այլ կերպ անվանել»,-ասել է Պուտինը Հորդանանի թագավոր Աբդալլահ երկրորդի հետ հանդիպման ժամանակ: ՌԴ պետդումայի դաշնային խորհրդում առա ջարկում են ժամանակավորապես կասեցնել Թուրքիայի հետ բոլոր կապերը ՌԴ դաշնային խորհրդում առաջարկում են ժամանակավորապես կասեցնել Թուրքիայի հետ բոլոր կապերը:

Իսկ Թուրքիան այս հարցով դիմել է ՄԱԿ-ի անվտանգության խորհրդին և ՆԱՏՕ-ին, ինչպես նաև ԱԳՆ է կանչել ԱՄՆ, Ֆրանսիայի, Չինաստանի և Միացյալ Թագավորության դեսպաններին: