ԱՄՆ-ը Ռուսաստանի և Թուրքիայի հետ քննարկում է կործանված ինքնաթիռի խնդրի կարգավորման հարցը

ԱՄՆ-ը քննարկումներ է վարում Ռուսաստանի և Թուրքիայի հետ կործանված ինքնաթիռի խնդրի կարգավորման շուրջ: «Արմենպրես»-ի փոխանցմամբ՝ նոյեմբերի 24-ին ԱՄՆ պետքարտուղարության ամենօրյա ճեպազրույցի ժամանակ այս մասին ասել է պետդեպի փոխխոսնակ Մարկ Թոները՝ պատասխանելով Թուրքիայի կողմից ռուսական ինքնաթիռի կործանման վերաբերյալ լրագրողների հարցերին։ «Այս փուլում մենք փորձում ենք պարզել, թե ինչ է տեղի ունեցել՝ միաժամանակ ընդգծելով լարվածության թոթափման և ապագայում նման իրավիճակներից խուսափելու անհրաժեշտությունը։ Մեզ համար կարևոր է հավաքել բոլոր փաստերը կատարվածի մասին հստակ պատկերացում կազմելու համար։ Մենք չենք ցանկանում հրատապ վճիռ կայացնել։ Եվ մենք կանգնած ենք Թուրքիայի կողքին որպես ՆԱՏՕ-ի դաշնակցի»,-նշել է Թոները' հավելելով, որ Թուրքիայի հետ համագործակցությունը շարունակական է լինելու։

Միացյալ Նահանգները մշտական խորհրդակցություններ է վարում Թուրքիայի հետ՝ վերջինի սահմանների անվտանգության վերաբերյալ։ Այն նաև համագործակցում է Թուրքիայի հետ ԻԼԻՊ-ի դեմ կռվող խմբավորումներին օժանդակելու և Սիրիայի հյուսիսում ԻԼԻՊ-ի դեմ օդային հարձակումներ գործելու հարցում։ Նա տեղեկացրել է, որ Հյուսիսատլանտյան դաշինքի նիստի ժամանակ Թուրքիան ներկայացրել միջադեպին նախորդած իրադարաձությունները, որոնք հանգեցրել են ստեղծված իրավիճակին։ Թոները նկատեց, որ ԱՄՆ նախագահ Բարաք Օբաման խոսել է ՆԱՏՕ֊ի և Ռուսաստանի միջև առկա խնդրի մասին՝ նշելո վ, որ Ռուսաստանը ռազմական գործողություններ է իրականացնում թուրքական սահմանին շատ մոտ, այն նաև թիրախավորում է սիրիական չափավոր ընդդիմությանը, և այդ հանգամանքները կարող էին հանգեցնել այս իրավիճակին։ Թոները նաև հիշեցրել է, որ նախագահ Օբաման և ՆԱՏՕ֊ի գլխավոր քարտուղար Ենս Սթոլթենբերգը կոչ են անում Անկարային և Մոսկվային քայլեր ձեռնարկել մեղմելու լարվածությունը։ Հարցին, թե արդյոք ՆԱՏՕ-ի դաշնակից Թուրքիան քննարկել է ԱՄՆ-ի հետ Ռուսաստանի կողմից հաջորդ հնարավոր ներխուժման հետևանքները և մասնավորապես՝ արդյոք ԱՄՆ֊ը տեղյակ է եղե, որ հաջորդ հնարավոր ներխուժման դեպքում նման միջադեպ կարող է տեղի ունենալ, պետդեպի փոխխոսնակը պատասխանել է․ «Մենք հասկանում ենք, որ երբ դու գործում ես նման բարդ պայմաններում, երբ կոալիցիան ամեն օր օդային հարձակումներ է իրականացնում ԻԼԻՊ-ի դեմ, մյուս կողմից Ռուսաստանի նման երկիրը, որը կոալիցիայի անդամ չէ և թիրախավորում է սիրիական չափավոր ընդդիմությանը, գործողություններ ծավալում ՆԱՏՕ-ի դաշնակցի սահմանների մոտ, այդ ամենն ստեղծում է շատ բարդ և վտանգավոր իրադրություն»: