«Ինչ անում ենք, մեր հայ ժողովրդի ոգեկան զորության համար ենք անում». Տ. Նավասարդ արքեպիսկոպոս Կճոյանը՝ «Գրաբարյան օրեր» ծրագրի մասին

Այսօր Արարատյան հայրապետական թեմի առաջնորդարանում տեղի ունեցավ «Գրաբարյան օրեր» ծրագրի մեկամյա աշխատանքների ամփոփումը:

«Գրաբարյան օրեր» ծրագիրը մեծ հետաքրքրություն է առաջացրել դպրոցներում թե՛ ուսուցիչների, թե՛ աշակերտների շրջանում: Դպրոցներում սկսվել է գրաբարի վերելքը և գրաբարն այժմ մտնում է պարտադիր առարկաների շարքը:

Քննարկումն ընթացավ ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանի նախագահությամբ: Մասնակցում էին ԿԳ նախարար Արմեն Աշոտյանը, ԵՊՀ աստվածաբանության ֆակուլտետի Հայ Եկեղեցու պատմության և եկեղեցաբանության ամբիոնի վարիչ Լևոն Սարգսյանը, հոգևոր այրեր:

ԼՈւՐԵՐ.com-ի թղթակցի տեղեկացմամբ՝ Տ. Նավասարդ արքեպիսկոպոս Կճոյանը հույս հայտնեց, որ այս ծրագիրը կշարունակի իր ընթացքը՝ հետզհետե ավելի ընդգրկուն դարձնելով իր ծավալները: «Ինչ անում ենք, մեր հայ ժողովրդի ոգեկան զորության համար ենք անում, որպեսզի ինքն իր մեջ արթնացնի ոսկեդարյա ոգին, ոսկեղենիկ հայերենի միջոցով»,- ասաց նա՝ շնորհակալություն հայտնելով Վեհափառին, ում օրհնությամբ էլ իրականացվում են ԱՀԹ բոլոր ծրագրերը:

Լրագրողների հետ զրույցում ԿԳ նախարար Արմեն Աշոտյանն ասաց, որ գրաբարը սովորեցնելու են երեխաներին՝ ստեղծելով հատուկ ուսումնական նյութեր: «Մենք հավակնում ենք հասնել մի նպատակի, որ երիտասարդը հետաքրքրությունից ելնելով՝ կարողանա տարրական իմացություն ունենա գրաբարից, կարողանա վերարժևորել գրաբարի կարևորությունը»,- ասաց նախարարը:

Նախորդ տարի մեկնարկած «Գրաբարյան օրեր» ծրագրով Երևանի մի շարք դպրոցներում իրականացվեցին գրաբարի ընթերցումներ, բաց դասեր, քննարկումներ, ինտելեկտուալ խաղեր:

«Գրաբարյան օրեր» ծրագրի նպատակն է նոր սերնդի մոտ արթնացնել հետաքրքրություն գրաբարի նկատմամբ, խթանել դրա ուսուցումը, ինչը կնպաստի մասնագետների աճին և հայկական հազարամյա ժառանգության զարթոնքին: