Վախճանվել է բանաստեղծ Զարեհ Խրախունին

Պոլսում 89 տարեկանում վախճանվել է վերջին տասնամյակների հայ պոեզիայի ինքնատիպ դեմքերից մեկը' Զարեհ Խրախունին (Արթօ Ճիւմպիւշեան): Այս մասին տեղեկացնում են Հայաստանի գրողների միության վարչությունից:

Զարեհ Խրախունին ծնվել է Կ. Պոլսում, 1926թ. հոկտեմբերի 16-ին: Նախնական կրթությունն ստանալով Գաբամաճյան, Մխիթարյան վարժարաններում' 1951թ. ավարտել է Կ. Պոլսի համալսարանը: Առաջին բանաստեղծությունները լույս են տեսել Մխիթարյան Սանուց միության «Սան» գրական ամսաթերթում: 50-ական թվականներին պաշտոնավարել է Էսայան, Կեդրոնական վարժարաններում' միաժամանակ շարունակելով ստեղծագործել: Պոլսահայ գրական նոր շարժման ներկայացուցիչների' Զահրատի, Ռ. Հատտեճյանի և այլոց հետ միասին 1959 թվականից խմբագրել է «ԹՕ» գրական հանդեսը:

Անցած տասնամյակներին ծննդավայրում, հայրենիքում և արտերկրում Զարեհ Խրախունին հրատարակել է բանաստեղծական բազմաթիվ ժողովածուներ' «Քար կաթիլներ»-ից (1964) մինչև «Տօնականչ» (2010), որոնք բազմադարյա հայ պոեզիայի ավանդույթների յուրովի շարունակությունն են' կյանքի և մտածողության նոր, արդիական տեղաշարժերին ու չափումներին համապատասխան:

Կատարել է բարձրորակ թարգմանություններ հատկապես ֆրանսիական ժամանակակից պոեզիայից: Իր երկերը ևս թարգմանվել են աշխարհի մի շարք լեզուներով' ֆրանսերեն, գերմաներեն, անգլերեն, վրացերեն, ռուսերեն և այլն: Նրա գրչին են պատկանում նաև արվեստագիտական, գրականագիտական ուսումնասիրություններ:

1989 թվականին արժանացել է Վազգեն Ա Հայրապետի կոնդակին և Սուրբ Սահակ-Սուրբ Մեսրոպ շքանշանին: Արժանացել է Համազգային «Անահիտ» գրական, ՀԲԸՄ Ալեք Մանուկյան մշակութային հիմնադրամի, ֆրանսահայ գրողների «Էլիզ Գաւուքճեան – Այվազեան», «Հայկաշէն Ուզունեան» գրական մրցանակներին: Պարգևատրվել է ՀՀ «Մովսես Խորենացի», Թուրքիայի Հայոց պատրիարքության Ա կարգի շքանշաններով:

2012թ. ՀՀ Նախագահի հրամանագրով պարգևատրվել է Սուրբ Մեսրոպ Մաշտոցի շքանշանով:

Հայրենաշունչ և ազատատենչ բանաստեղծի' Զարեհ Խրախունու կենարար արվեստը մշտապես ուղեկցելու է հայոց սերունդների երթը «դեպի աղբյուրը լույսի»: